Qashqadaryoda 2021-yilning o‘tgan davri mobaynida o‘z xizmat vazifasini bajarayotgan MIB xodimiga tajovuz qilgan besh nafar shaxsga jinoyat ishi qo‘zg‘atilgan. Bu haqda MIB viloyat boshqarmasi boshlig‘i Odil Poyonov ma’lum qildi, deya xabar berdi “Daryo” muxbiri.

Foto: MIB Qashqadaryo viloyat boshqarmasi

Qayd etilishicha, 25-sentabr kuni MIBning viloyat boshqarmasida jurnalist va blogerlar uchun matbuot anjumani tashkil etilgan.

“Xodimlarimiz qarzdor Sadinovdan undiruvchi Rahmonova foydasiga 1 million 947 ming so‘m aliment qarzdorlikni undirish uchun Sadinov uyiga borib, qarzdor xonadonidagi televizorni xatlab olganda qarzdor va uning yaqinlari qarshiligiga uchragan. MIB xodimlariga tan jarohati yetkazilgan. Bu ish yuzasidan Qamashi tuman prokuraturasi tomonidan Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) bilan jinoyat ishi qo‘zg‘atilgan.  Va Sadinovga nisbatan qamoqqa olish ehtiyot chorasi qo‘llanilgan”, — deydi Odil Poyonov.

Odil Poyonovning ma’lumot berishicha, 2021-yilning o‘tgan sakkiz oyi mobaynida MIB xodimlariga 5 nafar fuqaro qarshilik ko‘rsatgan bo‘lib, ularga qarshilik uchun jinoyat ishi qo‘zg‘atilgan, ayrimlariga chora ko‘rilgan.

“MIB xodimlariga qarshilik ko‘rsatish Qamashi tumanida, Kasbida, Yakkabog‘da, shuningdek Shahrisabz shahrida ro‘y bergan. Kasbida bolta bilan chopishga urunish bo‘lgan bo‘lsa, Yakkabog‘da yoqishga, Shahrisabzda mashinada bosib ketishga urinishgan. Kasbida MIB xodimiga bolta ko‘targan raisga uch yil axloq tuzatish ishlari tayinlangan, Qamashi va Yakkabog‘da esa tergov ketyapti”, — deydi mas’ul.

Foto: MIB Qashqadaryo viloyat boshqarmasi

Mas’ulning aytishicha, MIB xodimlari Shahrisabz shahrida qarzdorlikni undirish uchun avtomashinani xatlashga uringanda fuqaro MIB xodimini sudrab, mashinani olib qochgan.

“Yakkabog‘ tumaniga fuqaro Mohira Normurodovaning manfaatini ko‘zlab, uy-joyni unga olib berish bo‘yicha borganimizda xodimlarimiz ustiga yoqilg‘i sepilib, yoqib yuborishga urinish bo‘lgan. Shu sabab bu holat bo‘yicha ham jinoyat ishi qo‘zg‘atilib, tergov harakatlari olib borilmoqda”, — deydi Odil Poyonov.