Бухорода юк машинани тўлдириб саксовул ўғирлаган йигит ушланди. У табиий газ бўлмагани учун бунга қўл урганини айтган

Миллий гвардия Бухоро вилояти бўйича бошқармаси Ўсимлик ва ҳайвонот дунёсини муҳофаза қилиш юзасидан ўтказилган рейдда бир неча фуқаролар саксовул ўғирлагани аниқлади. Бу ҳақда «Дарё»га Миллий гвардия вилоят бўйича бошқармаси ахборот хизмати раҳбари Муроджон Раҳматуллоев хабар берди.

Маълум қилинишича, 2 февраль куни Миллий гвардия вилоят бўйича бошқармаси вилоят Экология ва атроф-муҳитни муҳофаза қилиш бошқармаси ҳамда вилоят ИИБ тезкор ходимлари билан ҳамкорликда Пешку тумани чўл ҳудудларида рейд тадбирларини ўтказган. Туманнинг «Бобоҳожи» МФЙда яшовчи 25 ёшли фуқаро Ф.Ҳ. ўзига тегишли бўлган «ГАЗ-53» юк машинасида ноқонуний равишда жами 52,5 метр куб бўлган саксовул ўсимлигини синдириб, кесиб олиб кетаётган вақтда қўлга олинган.

Ф.Ҳ.нинг яширин равишда талон-торож қилаётган саксовулларнинг қора бозордаги тахминий баҳоси 20 миллион сўмни ташкил қилиши аниқланган. Суҳбат давомида у ўзининг Бухоро давлат тиббиёт институтида таҳсил олаётгани, саксовулни сотиш учун эмас, ўзи яшаётган ҳудудда табиий газ йўқлиги ва қўлбола иситиш печларидан фойдаланишда ўтин, тараша масаласи ҳам оғир эканини ва бунга мажбур бўлганини билдирган. Саксовуллар тегишли тартибда расмийлаштириб олинган.

Кейинги ҳолат тумандаги «Қорақалпоқ» МФЙда яшовчи 24 ёшли фуқаро Д.А. ўзига тегишли бўлган «УАЗ» русумли автомашинада Пешку тумани чўл ҳудудидан жами 7,3 метр куб бўлган, қора бозордаги тахминий баҳоси 3 миллион сўмга яқин саксовулни ноқонуний равишда олиб кетаётганида тадбир иштирокчилари томонидан ушланган.

Айнан шу ҳудудда учинчи ҳолат 41 ёшли фуқаро Б.Ҳ. томонидан содир этилган. Б.Ҳ. ўзига тегишли «КамАЗ» юк машинасида Пешку тумани чўл ҳудудидан жами 89,1 метр куб бўлган, қора бозордаги тахминий баҳоси 34 миллион сўмга яқин саксовулни сотиш учун олиб кетаётганда ушланган. Айрим фуқаролар рейд давомида тадбир иштирокчиларига фаол қаршилик кўрсатиб, воқеа жойидан қочиб кетишга уринишган.

Ҳар уч ҳолат юзасидан фуқароларга нисбатан Маъмурий жавобгарлик тўғрисидаги кодекснинг 79-моддаси (ўсимлик дунёси объектларини йиғиш, тайёрлаш ва улардан фойдаланиш тартиби ҳамда шартларини бузиш) 1-қисми билан маъмурий баённома тузилган. Ушбу бандга кўра, фуқаро БҲМнинг 3 бараваридан 5 бараваригача (810 000 сўмдан 1 350 000 сўмгача), мансабдор шахсларга эса 5 баравардан 10 бараваргача (1 350 000 сўмдан 2 700 000 сўмгача) миқдорда жаримага тортилади.