Наманганда 35 ёшли маст эркак ҳақорат қилгани учун синфдошини пичоқлади

Наманган вилояти Уйчи туманида 30 январь фуқаро синфдошини куракда турмайдиган гаплари учун пичоқлади, деб хабар бермоқда Тергов департаменти.

Қайд этилишича, шу куни Ж.И. исмли фуқаро (1987 йилда туғилган) Ҳамзаобод кўчасида жойлашган синфдоши Н.Д.нинг уйига борган. Уни яшаш хонадонидан чиқариб, жанжаллашган. Шу пайт Н.Д. боши билан Ж.И.нинг юзига урган. Ж.И. эса ўзида бўлган ошхона пичоғи билан синфдошининг чап ёнбош қорин соҳасига бир марта уриб, тан жароҳати етказган ва воқеа жойидан яширинган.

Туман тиббиёт бирлашмасининг бирламчи тиббий маълумотномасига кўра, Н.Д.нинг чап ёнбош соҳасидан қорин бўшлиғига кириб борувчи кесилган санчилган жароҳати бор бўлиб, ушбу жароҳат ҳаёт учун хавфли бўлган оғир турдаги жароҳатлар сирасига киради.

Тергов давомида жиноятнинг келиб чиқиш сабаби аниқланганда, 30 январь куни гумонланувчи, жабрланувчи ҳамда уларнинг яна 7 нафар синфдоши «Оқтош» маҳалласи ҳудудида жойлашган кафеларнинг бирида спиртли ичимликлар истеъмол қилиб ўтиргани, шу вақтда Н.Д. синфдоши Ж.И.нинг шахсиятига тегиб, ҳақорат қилган. Ўтириш тугаганидан сўнг, Ж.И. синфдоши Н.Д.нинг уйига бориб юқоридаги ҳолатни вужудга келтиргани маълум бўлган.

Ҳолат юзасидан Ж.И.га нисбатан Жиноят кодекснинг 104-моддаси (қасддан баданга оғир шикаст етказиш) 2-қисми «л» банди билан жиноят иши қўзғатилиб, у процессуал тартибида ушланган. Ҳозирда дастлабки тергов ҳаракатлари олиб борилмоқда.