Андижонда тадбиркордан МИБ ҳисоб рақамига ортиқча ўтказилган маблағларни қайтариб бериш эвазига 3 миллион сўм талаб қилган банк юристи ҳамда МИБ ходими ушланди, деб хабар бермоқда «Дарё» мухбири.
Маълум бўлишича, 2022 йилнинг 28 январида ДХХ ҳамда Иқтисодий жиноятларга қарши курашиш департаментининг вилоят бошқармалари томонидан ўтказилган тезкор тадбирда «Халқ банки» Шаҳрихон туман филиали юристи М.Б. тадбиркор томонидан МИБ ҳисоб рақамига ўтказиб юборилган ортиқча 7,5 миллион сўм маблағни қайтариб бериш эвазига ундан товламачилик йўли билан 3 миллион сўм талаб қилиб, олаётганда ушланган.
Аниқланишича, М.Б. мазкур маблағни МИБнинг Шаҳрихон тумани бўлими давлат ижрочиси М.Ж. кўрсатмаси билан олган ва унга элтиб бериши керак бўлган. Тадбир давомида МИБ ижрочиси М.Ж. 3 миллион сўмни банк юристидан олаётган вақтда қўлга олинган.
Мазкур ҳолат юзасидан Андижон вилоят прокуратураси томонидан Жиноят кодексининг 25-моддаси (жиноятга тайёргарлик кўриш ва жиноят содир этишга суиқасд қилиш), 168-моддаси (фирибгарлик) 2-қисми «б» банди ва 211-моддаси (пора бериш) 1-қисми билан жиноят иши қўзғатилган. М.Ж. ва Б.М.га нисбатан қамоққа олиш тарзида эҳтиёт чораси қўлланилган.
Аввалроқ Андижонда ўз вазифасини бажариш учун 4 минг доллар пора сўраган МИБ ходимлари ушлангани тўғрисида хабар берилганди. Мазкур ҳолат сабаб МИБнинг Андижон шаҳар ва Андижон туман бўлим бошлиқлари лавозимларидан озод қилинганди.
Изоҳ (0)