Тошкент имтиҳон маркази — бу ҳайдовчилик гувоҳномасини олишга номзодлар назарий ва амалий тест синовларидан иборат автоматлаштирилган имтиҳон комплекси. Бу ҳақда 3 февраль куни пойтахтда бўлиб ўтган марказ тақдимотида маълум қилинди, дея хабар бермоқда «Дарё» мухбири.
Марказнинг афзалликларидан бири шундаки, фуқаролар билимини баҳолашда инсон омили иштирок этмайди, бутун жараён автоматлаштирилган ҳамда шаффоф.
Назарий имтиҳонлар учун 25 дақиқа вақт ажратилган. Мазкур имтиҳонда 20 та саволнинг 18 тасига тўғри жавоб берилса, имтиҳондан ўтган ҳисобланади. Шундан сўнг транспорт воситасини бошқариш учун амалий имтиҳонларга рухсат берилади. Номзод барча имтиҳонлардан муваффақиятли ўта олса, унга махсус сертификат берилади. Ушбу сертификат асосида фуқаролар Йўл ҳаракати хавфсизлиги инспекциясида ёки давлат хизматлари марказларида ҳайдовчилик гувоҳномасини олиши мумкин.
Автоматлаштирилган схема бўйича амалий имтиҳон ўтказиш учун «А», «Б», «C», «Д», «БЕ», «CЕ» ва «ДЕ» тоифали автомобиллар мавжуд. Ногиронлиги бўлган шахслардан амалий имтиҳон олиш тегишли тиббий кўрсатмаларга мос келадиган транспорт воситаларида амалга оширилади.
Маълумот учун, президентнинг 2020 йил декабрь ойидаги қарорига кўра, тадбиркорлик субъектларига ҳам ҳайдовчилик гувоҳномасини олиш учун назарий ва амалий имтиҳонларни ўтказиш ҳуқуқи берилган. Ушбу масалани тартибга солиш бўйича 2021 йил май ойидаги Ҳукумат қарори ҳам қабул қилинган.Эслатиб ўтамиз, Шавкат Мирзиёев 2022 йил 26 январь куни кенгайтирилган видеоселектор йиғилишида йўл ҳаракати хавфсизлиги билан боғлиқ вазиятни танқид қилган эди. Давлар раҳбари ҳайдовчиларни тайёрлаш ҳамда имтиҳон тизимини тубдан қайта кўриб чиқиш бўйича ҳам мутасаддиларга бир қатор топшириқлар берганди.Фото
Изоҳ (0)