Турли хил смузилар, қовурилган жўжа, олхўрили пудинг — Кейт Миддлтоннинг сарвқомат бўлишини таъминловчи меню

Кембриж герцогиняси соғлом турмуш тарзи ва спортни яхши кўриши билан машҳур. Унинг диетаси мувозанатли ва хилма-хил егуликларга асосланган, аммо у ширинлик ва жуда юқори калорияли овқатларни ҳам истисно қилмайди. Шаҳзода Уильям рафиқасининг менюсига нималар киритилгани ҳақида қуйида тўхталамиз.

Нонушта

Кейт турли хил смузиларнинг ашаддий мухлиси бўлиб, уларни кўпроқ нонуштада истеъмол қилишни афзал кўради. Mail online интернет нашрига кўра, Кейт смузиларни қуйидаги рецепт бўйича тайёрлайди: у кейл, спирулина, матча, салат барги, исмалоқ, кашнич ва черникани блендерда аралаштиради. Шаҳзода Уильямнинг рафиқаси баъзида нонуштага сули ёрмасини ҳам истеъмол қилиши мумкин.

Тушлик

Кейт Миддлтон вегетариан эмас, лекин гўштни камдан кам истеъмол қилади. Уильям билан Ҳиндистонга қилган қироллик сафари чоғида жуфтлик учун қироллик томонидан тайинланган ошпаз Рагу Деора тушлик учун уларга сабзавотли кабоб ва ясмиқли карри пиширганини айтди. «Ҳаммаси вегетарианча овқатлар эди, чунки менга улар шу каби таомни яхши кўришларини айтишди», — дейди у.

Кейт ва Уильям сушини жуда яхши кўришлари ҳам маълум. Герцогинянинг бошқа севимли таомлари ҳам бор — тарвуз, авакадо, пиёз, бодринг ва фета пишлоғи, табуле, севиче ва гаспачо қўшиб тайёрланадиган салат.

Кечки овқат

Қироллик вакиласининг кечки таоми унчалик камтарона эмас. Кечки овқат учун у паста, карри ёки қовурилган жўжа ейиши мумкин. Охирги таом одатда қироллик оиласида жуда машҳур. Қироллик эксперти Кети Николнинг Vanity Fair журналига айтишича, Кейт баъзан кечқурунлари турмуш ўртоғини унинг севимли таоми — қовурилган жўжа пишириб хушнуд қилиб туради.

Қироллик оиласида паста ҳам жуда машҳур. Уильям ва Кейтнинг фарзандлари ҳам уни севиб истеъмол қилади. Жорж, Шарлотта ва Луига пастани тайёрлаш жараёни кўпроқ ёқади, шунинг учун улар баъзида онасига ошхонада ёрдам беришади.

Газаклар

Кембриж герцогиняси соғлом овқатланишни афзал кўради. Агар у овқатланиш оралиғида очликни ҳис қилса, доимо қўлида янги мева, сабзавотлар ёки гожи мевалари бўлади.

Бироқ баъзида у бошқа нарсаларга ҳам рухсат беради. Нью-Йоркдаги баскетбол ўйинида Кейт Миддлтон ва шаҳзоданинг попкорн еяётганини кўришган.

Десерт

Кейт ўзини ширинликлар билан сийлаб туради. Унинг севимли ширинликларидан бири — Буюк Британияда машҳур бўлган олхўрили ёпишқоқ тоффи-пудингдир.

Умуман олганда, Кейт Миддлтон таомланишда ўзини чекламайди. У янги таомларни синаб кўришни яхши кўради ва турли мамлакатларга саёҳатлар пайтида уларнинг миллий таомларини татиб кўришдан бош тортмайди. Асосийси, ҳамма нарсанинг меъёрини билиш, шундагина севимли пудингингиз қоматингизга таъсир қилишидан ташвишланмасангиз ҳам бўлади.