Тошкентда юз берган ёнғинни ёритмоқчи бўлган «Миллий» телеканалининг икки ходими калтакланди

Тошкент шаҳри Чилонзор туманида 24 январь куни омборхоналарнинг бирида ёнғин чиққани хабар қилинганди. «Миллий» телеканалининг хабар қилишича, воқеани ёритишга келган телеканал ходимлари номаълум шахслар томонидан калтакланди.

Қайд этилишича, 24 январь куни соат 09:58 да туманнинг Бунёдкор кўчасида жойлашган омборхонада ёнғин бўлаётгани тўғрисида туман ФВ бўлимига хабар келиб тушган. Шунга кўра, 10 та ёнғин-қутқарув экипажи воқеа жойига етиб борган. Ҳодиса оқибатида жабрланган ва ҳалок бўлганлар йўқ.

«Миллий» телеканалининг «Миллар» дастури мухбири ва тасвирчилари ФВБ ходимлари рухсати ва инспекторнинг назорати билан воқеа жойидан репортаж тайёрлашга киришган. Шу пайт ОАВ ходимлари калтакланган.

«Бирдан номаълум шахслар тасвирчига ташланиб, 5-6 киши уриб ташлади. Ҳамма жойи қон бўлиб ётибди, лаби йиртилган. Ўзим шокка тушиб қолдим, микрофонимни олиб, зўрға ташқарига чиқишга улгурдим», — дейди мухбир.

Дўппослаган шахслар, шунингдек, ходимларнинг камераларини ҳам олиб қўйган.

Жабрланувчилар ҳолат юзасидан Чилонзор тумани ички ишлар бўлимига ариза билан мурожаат қилган.

«Дарё» сўровига кўра, Бош прокурор матбуот котиби Ҳаёт Шамсутдинов вазият бўйича маълумот берди. Унда айтилишича, «Миллий» телеканали тасвирга олиш гуруҳи ходимлари ҳолатни видеолавҳага олаётган вақтида уларга омборхона ишчи ходимлари ва уларга ўт ўчиришда ёрдамлашаётган шахслар фаол қаршилик кўрсатиб, тан жароҳати етказган. Оқибатда М.А. (2000 йилда туғилган) ва Ҳ.О. (2001 йилда туғилган) исмли мухбирлар жабрланган.

Ҳуқуқбузарлик ҳолатини У.З. (1990 йилда туғилган) ва А.Ғ (1985 йилда туғилган) исмли тадбиркорлар содир этгани аниқланган.

Ҳозирда қўшимча суриштирув ҳаракатлари олиб борилмоқда.