Шавкат Мирзиёев электр энергияси қувватларини ошириш ҳамда уни етказиб беришни автоматлаштириш бўйича қарор лойиҳасини тайёрлашга кўрсатма берди. Бу ҳақда президент матбуот хизмати хабар берди.
Хабарга кўра, давлат раҳбари 30 январь куни ёшлар, спорт, соғлиқни сақлаш, электр энергияси соҳаларидаги лойиҳалар тақдимоти билан танишди. Тақдимотда электр энергияси қувватларини кенгайтириш чора-тадбирлари ҳам муҳокама қилинди.
Маълумки, шу йил 25 январь куни минтақа электр таъминотида техник узилиш содир бўлди. Бу барча электр станцияларга таъсир қилиб, фавқулодда вазият юзага келди. Президент матбуот хизмати ахборотида таъкидланишича, бунга бир қанча сабаблар бор. Жумладан, ягона энергетика тизими 220—500 киловолтли магистрал электр тармоқлар орқали тўлиқ ҳалқалаштирилмаган. Шимоли-ғарбий ва Жануби-ғарбий энергоузелнинг асосий қисмида 500 киловолтли тармоқлар йўқ. Баъзи магистрал тармоқлар қўшни давлатлар ҳудуди орқали ўтган.
Шу боис, мамлакатда 500—750 киловолтли тармоқларни қуриш орқали ягона ҳалқа тизимини ҳосил қилиш режалаштирилмоқда. Хусусан, 2026 йилга бориб, жами генерация қувватларини 27 минг 400 мегаваттга, йиллик ишлаб чиқариш ҳажмини 110 миллиард киловатт соатга етказиш мўлжалланган. Шунда Ўзбекистоннинг барча ҳудудлари 500—750 киловолтли тармоқлар орқали мустаҳкам боғланади ва бир бутун тизим яратилади.
«Президентимиз электр энергияси тизимини ислоҳ қилиш, қўшни давлатлар билан соҳадаги ҳамкорликни давом эттириш ва ривожлантириш зарурлигини таъкидлади. Электр энергияси қувватларини ошириш ҳамда уни етказиб беришни автоматлаштириш бўйича қарор лойиҳасини тайёрлашга кўрсатма берилди. Бундан асосий мақсад электр энергияси тизимини барқарор қилиб, хавфсизлигини мустаҳкамлаш, халқимизни бу муҳим манба билан узлуксиз таъминлашдир», — дейилади хабарда.Эслатиб ўтамиз, давлат раҳбари 26 январь куни бўлиб ўтган видеоселектор йиғилишида ҳам мамлакатда содир бўлган электр энергияси билан боғлиқ ҳолат юзасидан муносабат билдирган эди. «Бу ҳодисадан тўғри хулоса қилиб, биз Ўзбекистон тараққиётини давримизнинг глобал муаммолари билан янада боғлиқ ҳолда кўришимиз керак. Бу борадаги мавжуд таҳдид ва муаммоларни бартараф этишга доимо тайёр туришимиз керак», — деган эди президент.
Изоҳ (0)