Shimoliy Koreya 30-yanvar kuni Yapon dengizi tomonga noma’lum snaryad uchirdi, deb yozmoqda Yonhap agentligi Janubiy Koreya shtab boshliqlarining birlashgan qo‘mitasiga tayanib.
Yaponiya mudofaa vazirining so‘zlariga ko‘ra, snaryad ballistik raketa bo‘lishi mumkin, deb xabar beradi Kyodo. Keyinchalik Janubiy Koreya harbiylari ham xuddi shunday taxminni ilgari surdi.
Yaponiya qirg‘oq qo‘riqlash xizmati snaryad allaqachon qulaganini xabar qilgan. Muassasa obyekt xavfli bo‘lishi mumkinligidan ogohlantirgan.
Yaponiya hukumati matbuot kotibi Xirokadzu Matsunoning so‘zlariga ko‘ra, taxmin qilingan ballistik raketa 800 km uchgan, maksimal parvoz balandligi esa 2 ming km atrofida bo‘lgan. Matsuno snaryadni uchirish Birlashgan Millatlar Tashkilotining Xavfsizlik Kengashi rezolyutsiyalarini buzganini ta’kidladi. Mamlakat KXDRga keskin norozilik bildirgan.
Yaponiya bosh vaziri Fumio Kisida hukumatga voqealar to‘g‘risida jamoatchilikni zudlik bilan xabardor qilishni, kemalar va samolyotlar xavfsizligini ta’minlashni topshirdi. Hukumatdagi manbaning Kyodo agentligiga aytishicha, uchirishdan ko‘rilgan zarar haqida hozircha ma’lumotlar mavjud emas.
Janubiy Koreya harbiylari noma’lum snaryadni uchirish Chagando provinsiyasi hududidan amalga oshirilgan, deb taxmin qilmoqda.
Bu Shimoliy Koreyaning 2022-yil boshidan beri yettinchi marta raketa uchirishi. So‘nggi marta Janubiy Koreya harbiylari 27-yanvar kuni qo‘shni davlat tomonidan snaryadlar uchirilgani haqida xabar bergandi. O‘shanda KXDR Yapon dengizi tomon ikkita qisqa masofali ballistik raketa uchirgani taxmin qilingan.
Undan avval Shimoliy Koreya 25-yanvar kuni raketa uchirgan edi. Mamlakat joriy yildagi birinchi raketasini 5-yanvar kuni, ikkinchisini — 11-yanvarda, uchinchisini — 14-yanvarda uchirgan. Shuningdek, 17-yanvar kuni ham Yapon dengizi tomon yana bir snaryad uchirilgan. Kyodo agentligi ma’lumotlariga ko‘ra, gap ballistik raketalar haqida ketmoqda.
Raketalarning uchirilishi fonida AQSh 13-yanvar kuni KXDRga nisbatan BMT tarmoqlari bo‘yicha yangi sanksiyalarni joriy etish taklifini bildirdi. Mamlakatning BMTdagi doimiy vakili Linda Tomas-Grinfildning so‘zlariga ko‘ra, Vashington har bir raketa uchirilishi BMT Xavfsizlik Kengashi rezolyutsiyasini buzmoqda deb hisoblaydi.
Shundan so‘ng, Shimoliy Koreya AQSh Pxenyanga nisbatan yangi sanksiyalarni joriy etgach, “yanada kuchli va aniq javob” qaytarishga majbur bo‘lishi haqida ogohlantirdi.
Izoh (0)