Тошкент ҳайвонот боғида аёл кичкина қизалоқни айиқ волерига ташлаб юборганлиги ҳолати юзасидан жиноят иши қўзғатилди. Бу ҳақда Бош прокуратура ахборот хизмати «Дарё» сўровига асосан маълумот берди.
Қайд этилишича, 28 январь куни соат 14:30 ларда фуқаро З.Т. Тошкент ҳайвонот боғидаги айиқ қафаси олдига 2018 йилда туғилган З.А. билан биргаликда келиб, уни қасддан ўлдириш мақсадида қафаснинг томошабинлар учун мўлжалланган жойдан, юқори баландликда З.А.ни бир неча дақиқа ушлаб туриб, қафасга ташлаб юборган.
Натижада З.А. олган ҳаёт учун хавфли бўлган оғир тан жароҳатлари билан Республика шошилинч тиббий ёрдам илмий марказига ётқизилган ва кўрсатилган шошилинч тиббий ёрдам натижасида ҳаёти сақлаб қолинган.
Мазкур ҳолат юзасидан РШТЁИМ томонидан 28 январь куни тақдим қилинган тиббий маълумотномага кўра, вояга етмаган З.А.да бош мия ёпиқ жароҳати, бош мия жароҳати, бош асоси синиши, юмшоқ тўқималари лат ейиши каби тан жароҳатлари мавжудлиги аниқланган.
Шунингдек, З.Т.нинг юқоридаги ҳаракатларида оғирлаштирувчи ҳолатларда, айбдорга аён бўлган ожиз аҳволдаги шахсни қасддан ўлдиришга суиқасд қилишда ифодаланган ва Жиноят кодексининг 25-(жиноятга тайёргарлик кўриш ва жиноят содир этишга суиқасд қилиш), 97-моддаси 2-қисми «в» банди (қасддан одам ўлдириш айбдорга аён бўлган ожиз аҳволдаги шахсни) билан Юнусобод туман прокуратураси томонидан жиноят иши қўзғатилиб, ҳозирда тергов ҳаракатлари ўтказилмоқда.
Аввалроқ Тошкент ҳайвонот боғида аёл ёш қизалоқни айиқ қафасига ташлаб юборгани, Зузу лақабли айиқ зовурга тушиб, қизалоқни ҳидлаб кўриб, ундан узоқлашганлиги ҳақида хабар берилган эди.
Изоҳ (0)