Тошкентда хитойлик эркакка куч ишлатиб, унинг 5,5 минг доллардан ортиқ пулларини талон-торож қилган аёлларга суд ҳукми ўқилди. Бу ҳақда Тошкент шаҳар суди матбуот хизмати хабар берди.
Маълум қилинишича, Д.Х. исмли аёл вояга етмаган У.А. билан тил бириктириб, хитойлик эркакнинг пулларини қўлга киритишни мақсад қилган ва уни телефон орқали чақирган. Аёллар эркакнинг машинасида кетаётганда Д.Х. куч ишлатган ҳолда Хитой фуқаросининг бўйнидан ушлаб, бир қўли билан сиркага ботирилган матони юзига босган. Аммо эркак ҳушидан кетиш ўрнига машинани тўхтатиб, қочиб кетган.
Шундан сўнг Д.Х. ва У.А. машина юкхонасидан эркакка тегишли бўлган фуқаролик паспорти, ҳайдовчилик гувоҳномаси, иш гувоҳномаси, 5,5 минг доллар, 2 минг юань, 15 минг рубль ва бир дона флеш-карта бўлган кўк рангли сумкани талон-торож қилиб, унга жами 61,577 миллион сўм миқдорида моддий зарар етказиб, воқеа жойидан яширинган.
Бундан ташқари, Д.Х. ва У.А. хитойлик эркакка тегишли бўлган ҳужжатларни далага ташлаб, йўқ қилган.
Мазкур аёлларга нисбатан чиқарилган суд ҳукмига кўра, фуқаро Д.Х. 4 йил 6 ой муддатга озодликдан маҳрум этилган. Унинг шериги У.А.га эса 1 йил 8 ой 24 кун муддатга озодликни чеклаш жазоси тайинланган.
Шунингдек, жабрланувчи фойдасига 10 миллион 651 минг сўм моддий зарар ундирилиши белгиланган.
Аввалроқ Бухорода 8-синф ўқувчиси қўшнисининг қарийб 5 млн сўмлик буюмларини ўғирлагани, Тошкентдаги бозордан 280 минг сўмлик буюмларни ўғирлаган тўрт аёл қўлга олингани, Наманганда 15 ёшли қизлар ўзганинг кир машинасини жабрланувчининг уйидаёқ сотиб юборгани тўғрисида хабар берилганди.
Изоҳ (0)