Тошкент халқаро аэропорти электр энергиясидаги узилишлар сабаб рейсларни қабул қилмаётгани тўғрисида хабар берилганди. Uzbekistan Airports’нинг маълум қилишича, Ўзбекистон аэропортлари фаолияти тикланган.
Таъкидланишича, Тошкент халқаро аэропорти фақат самолётларни қабул қилмоқда.
Uzbekistan Airways матбуот хизматининг маълум қилишича, электр энергия таъминотида кузатилган узилиш боис, Ўзбекистонга келаётган ва мамлакатдан чет эл давлатларига саёҳатни режалаштирган барча йўловчилар авиапарвозлари вақти ва жадвали мажбурий ўзгартирилиши мумкин.
25 январь куни соат 11:00 ларда Ўзбекистоннинг қатор вилоятларида электр энергияси таъминоти узилди. Тошкент метрополитени фаолияти ҳам тўхтаган, Республикадаги барча поездлар ўз манзилларига кечикиб етиб бориши айтилмоқда. Тошкент шаҳар ИИББ эса тибандликларнинг олдини олиш мақсадида кўчага зарурат бўлмаса, шахсий машинада чиқмасликни тавсия қилмоқда.
Энергетика вазирлигининг маълум қилишича, Қозоғистон Электр тармоғида катта авария бўлиши оқибатида Олмаота, Чимкент, Тарас, Туркистон (вилоятларида) ва атроф ҳудудларида Электр энергия таъминотида ўчишлар юзага келган. Вазирлик маълумотларига кўра, ҳозирда Тошкент вилоятидаги Чорвоқ, Хожикент ва Товоқсой гидроэлектр станциялари, Навоий вилоятидаги Навоий иссиқлик электр станцияси, Қорақалпоғистон Республикасидаги Тахиатош иссиқлик электр станцияси ҳамда Фарғона вилоятидаги Фарғона иссиқлик электр маркази орқали энергетика тизимига қувват узатиш бошланган.
Изоҳ (0)