Марказий Осиё ягона электр тармоғида 25 январь куни катта авария бўлиши оқибатида Ўзбекистон ҳудудларида электр энергияси таъминотида ўчишлар юзага келганди. Шу сабабли мамлакат Афғонистонга электр энергиясини етказиб беришни тўхтатди, деб хабар қилди «РИА Новости».
Спутникънинг қайд этишича, ҳозир ҳукумат маҳаллий истеъмолчиларни энергия билан таъминлаш масаласини ҳал қилиш билан банд. Вазият имкон берса, экспорт қайта тикланади.
«Афғонистоннинг ДАБС энергетика компанияси маълумотларига кўра, мутахассислар Кобулни Туркманистон томонидан етказиб бериладиган энергия билан таъминлашга муваффақ бўлди», — дейилади хабарда.
Эслатиб ўтамиз, 25 январь куни соат 11:00 ларда Ўзбекистоннинг қатор вилоятларида электр энергияси таъминоти узилди. Тошкент метрополитени фаолияти ҳам тўхтаган, Республикадаги барча поездлар ўз манзилларига кечикиб етиб бориши айтилмоқда. Тошкент шаҳар ИИББ эса тибандликларнинг олдини олиш мақсадида кўчага зарурат бўлмаса, шахсий машинада чиқмасликни тавсия қилмоқда.
Энергетика вазирлиги маълумотларига кўра, ҳозирда Тошкент вилоятидаги Чорвоқ, Ҳожикент ва Товоқсой гидроэлектр станциялари, Навоий вилоятидаги Навоий иссиқлик электр станцияси, Қорақалпоғистон Республикасидаги Тахиатош иссиқлик электр станцияси ҳамда Фарғона вилоятидаги Фарғона иссиқлик электр маркази орқали энергетика тизимига қувват узатиш бошланган. «Дарё» нашри ходимлари ва ўқувчиларининг хабар беришича, Тошкент шаҳрининг айрим ҳудудларида электр таъминоти тикланган.
Кейинроқ Президент матбуот котиби Шерзод Асадов «вазият шахсан президент назорати остида» эканини маълум қилиб, фуқароларни саросимага тушмасликка чақирди. Шавкат Мирзиёев топшириғи билан электр энергиясида кузатилаётган носозлик бўйича комиссия тузилди. Энергетика вазирлиги Қорақалпоғистон ва Хоразмда электр энергияси тўлиқ тикланганини хабар қилди. Тошкент шаҳри ва Сирдарё вилоятининг бир қатор ҳудудларида ичимлик суви таъминоти тикланди. Тошкент ИЭСнинг фаолияти қисман тикланиб, 7 та энергоблокдан 5 таси барқарор иш фаолиятига келтирилди.
Изоҳ (0)