Markaziy Osiyo yagona elektr tarmog‘ida 25-yanvar kuni katta avariya bo‘lishi oqibatida O‘zbekiston hududlarida elektr energiyasi ta’minotida o‘chishlar yuzaga kelgandi. Shu sababli mamlakat Afg‘onistonga elektr energiyasini yetkazib berishni to‘xtatdi, deb xabar qildi “RIA Novosti”.
Sputnik’ning qayd etishicha, hozir hukumat mahalliy iste'molchilarni energiya bilan ta'minlash masalasini hal qilish bilan band. Vaziyat imkon bersa, eksport qayta tiklanadi.
“Afg‘onistonning DABS energetika kompaniyasi ma’lumotlariga ko‘ra, mutaxassislar Kobulni Turkmaniston tomonidan yetkazib beriladigan energiya bilan ta’minlashga muvaffaq bo‘ldi”, — deyiladi xabarda.
Eslatib o‘tamiz, 25-yanvar kuni soat 11:00 larda O‘zbekistonning qator viloyatlarida elektr energiyasi ta’minoti uzildi. Toshkent metropoliteni faoliyati ham to‘xtagan, Respublikadagi barcha poyezdlar o‘z manzillariga kechikib yetib borishi aytilmoqda. Toshkent shahar IIBB esa tibandliklarning oldini olish maqsadida ko‘chaga zarurat bo‘lmasa, shaxsiy mashinada chiqmaslikni tavsiya qilmoqda.
Energetika vazirligi ma’lumotlariga ko‘ra, hozirda Toshkent viloyatidagi Chorvoq, Hojikent va Tovoqsoy gidroelektr stansiyalari, Navoiy viloyatidagi Navoiy issiqlik elektr stansiyasi, Qoraqalpog‘iston Respublikasidagi Taxiatosh issiqlik elektr stansiyasi hamda Farg‘ona viloyatidagi Farg‘ona issiqlik elektr markazi orqali energetika tizimiga quvvat uzatish boshlangan. “Daryo” nashri xodimlari va o‘quvchilarining xabar berishicha, Toshkent shahrining ayrim hududlarida elektr ta’minoti tiklangan.
Keyinroq Prezident matbuot kotibi Sherzod Asadov “vaziyat shaxsan prezident nazorati ostida” ekanini ma’lum qilib, fuqarolarni sarosimaga tushmaslikka chaqirdi. Shavkat Mirziyoyev topshirig‘i bilan elektr energiyasida kuzatilayotgan nosozlik bo‘yicha komissiya tuzildi. Energetika vazirligi Qoraqalpog‘iston va Xorazmda elektr energiyasi to‘liq tiklanganini xabar qildi. Toshkent shahri va Sirdaryo viloyatining bir qator hududlarida ichimlik suvi ta’minoti tiklandi. Toshkent IESning faoliyati qisman tiklanib, 7 ta energoblokdan 5 tasi barqaror ish faoliyatiga keltirildi.
Izoh (0)