Истанбул халқаро аэропорти фаолияти тўлиқ тўхтатилгани сабабли Uzbekistan Airways’нинг 25 январь куни учиши режалаштирилган рейслари бекор қилинди. Бу ҳақда авиакомпания матбуот хизмати хабар берди.
Эслатиб ўтамиз, Истанбул халқаро аэропортида ноқулай об-ҳаво шароити (кучли қор, кўришнинг етарли даражада эмаслиги) туфайли 25 январь куни соат 07:40 да Тошкентдан Истанбулга учиши керак бўлган HY-271 рейси 13:00 га, Истанбул—Тошкент йўналиши бўйича учиши керак бўлган HY-072 рейс эса Истанбул вақти билан соат 12:30 дан 17:50 га кўчирилганди.
Хабарда айтилишича, Тошкент —Истанбул—Тошкент йўналиши бўйича амалга оширилиши лозим бўлган ушбу икки рейс, шунингдек, HY-273, HY-274 рейслари бекор қилинди.
Бекор қилинган парвозлар йўловчилари чиптанинг тўлиқ қийматини сотиб олинган жойда қайтариш ёки 26 январь кунига ёки парвозлар қайта тикланганидан кейин ҳар қандай кунга бепул кўчириш ҳуқуқига эга.
Ўзбекистоннинг Истанбулдаги бош консулхонаси аэропорт ва йўллардаги тирбандликни, ҳамда парвозлар бекор қилинганини эътиборга олиб, аэропортга бормасликка чақирди.
Шунингдек, қайд этилишича, айни вақтда аэропортда турли давлатлар фуқаролари тўпланиб қолиб, еб-ичиш, ҳожатхона, кутиш, ПЗР-тест топшириш, алоқа ва бошқа муаммолар кўзга ташланмоқда. Аэропортда протест қилган шахсларга нисбатан полиция томонидан чора кўрилгани ҳақида маълумотлар олинди.
Бош консулхона аэропортда йўловчилар норозилиги акс этган видеолавҳа ҳам эълон қилди, бироқ кўп ўтмай уни каналдан ўчириб ташлади.
Изоҳ (0)