24 январь ҳолатига кўра, Россияда яна 65 109 кишида коронавирус аниқланди, деб хабар беради COVID-19 га қарши кураш бўйича федерал тезкор штаб. Бу бутун пандемия давридаги энг юқори кўрсаткич. Мамлакатда кунлик касалланиш бўйича рекорд кўрсаткич кетма-кет тўрт кундан буён янгиланмоқда.
Маълум қилинишича, Россияда пандемия бошланганидан буён коронавирусга чалинганларнинг умумий сони 11 миллион 173 минг 300 кишига етган.
Шаҳар штаби маълумотларига кўра, Москвада ўтган бир сутка ичида 19 509 кишида COVID-19 тасдиқланган.
Сўнгги бир кун давомида Россияда 655 киши коронавирус асоратлари оқибатида вафот этган. Мамлакатда пандемия бошидан буён вафот этганлар сони 326 767 кишига етди. Ҳозирга қадар 10 миллион 45 минг 336 киши соғайган.
Meduza нашрининг ёзишича, COVID-19 га қарши кураш бўйича федерал тезкор штаб 20 январдан бошлаб ўзининг Telegram каналида статистика бериш форматини ўзгартирган. Эндиликда штаб суткалик касалланиш ҳолатини вилоятлар кесимида эълон қилмаяпти. Кунлик ҳисоботдан шифохонага ётқизилганлар сони келтирилмоқда ва айнан улар инфрографиканинг бошидан ўрин олган. Шунингдек, тезкор штаб Россияда пандемия бошидан бери коронавирусдан вафот этганлар сонини кунлик режимда эълон қилишни тўхтатган, фақатгина ўтган суткада қанча одам вафот этгани маълум қилинмоқда.
Аввалроқ «Роспотребнадзор» раҳбари Анна Попов вазият ёмонлашса, кунлик касалланишлар сони 100 минг кишидан ошиши мумкинлиги ҳақида огоҳлантирган эди.
Изоҳ (0)