24-yanvar holatiga ko‘ra, Rossiyada yana 65 109 kishida koronavirus aniqlandi, deb xabar beradi COVID-19 ga qarshi kurash bo‘yicha federal tezkor shtab. Bu butun pandemiya davridagi eng yuqori ko‘rsatkich. Mamlakatda kunlik kasallanish bo‘yicha rekord ko‘rsatkich ketma-ket to‘rt kundan buyon yangilanmoqda.
Ma’lum qilinishicha, Rossiyada pandemiya boshlanganidan buyon koronavirusga chalinganlarning umumiy soni 11 million 173 ming 300 kishiga yetgan.
Shahar shtabi ma’lumotlariga ko‘ra, Moskvada o‘tgan bir sutka ichida 19 509 kishida COVID-19 tasdiqlangan.
So‘nggi bir kun davomida Rossiyada 655 kishi koronavirus asoratlari oqibatida vafot etgan. Mamlakatda pandemiya boshidan buyon vafot etganlar soni 326 767 kishiga yetdi. Hozirga qadar 10 million 45 ming 336 kishi sog‘aygan.
Meduza nashrining yozishicha, COVID-19 ga qarshi kurash bo‘yicha federal tezkor shtab 20-yanvardan boshlab o‘zining Telegram kanalida statistika berish formatini o‘zgartirgan. Endilikda shtab sutkalik kasallanish holatini viloyatlar kesimida e’lon qilmayapti. Kunlik hisobotdan shifoxonaga yotqizilganlar soni keltirilmoqda va aynan ular infrografikaning boshidan o‘rin olgan. Shuningdek, tezkor shtab Rossiyada pandemiya boshidan beri koronavirusdan vafot etganlar sonini kunlik rejimda e’lon qilishni to‘xtatgan, faqatgina o‘tgan sutkada qancha odam vafot etgani ma’lum qilinmoqda.
Avvalroq “Rospotrebnadzor” rahbari Anna Popov vaziyat yomonlashsa, kunlik kasallanishlar soni 100 ming kishidan oshishi mumkinligi haqida ogohlantirgan edi.
Izoh (0)