«Порлоқ Арманистон» партияси раҳбари Эдмон Марукян ва ташқи ишлар вазири Арарат Мирзоян Арманистон президентлиги лавозимига даъвогарлик қилиши мумкин, деб хабар беради «Интерфакс».
«Арманистон президенти лавозимига ТИВ раҳбари Арарат Мирзоян қизиқиш билдирмоқда», — деб ёзади «168 соат» нашри. Газета билан суҳбатда Марукян сайловлардаги иштироки ҳақида «вақти келганда гапиришини, ҳозирча бунга муносабат билдира олмаслигини» айтган.
Марукян Арманистон парламентининг мухолиф депутати бўлган, 2017–2019 йилларда мамлакатнинг амалдаги бош вазири Никол Пашинян билан битта депутатлик блокида эди. 2021 йилда ўтказилган навбатдан ташқари парламент сайловларида унинг «Порлоқ Арманистон» партияси қонунчилик органига кира олмаган.
23 январь куни Арманистон президенти Армен Саркисян истеъфога чиқишини эълон қилди. «Мен узоқ ўйладим ва тўрт йил давомида фаол ишлаганимдан сўнг республика президенти лавозимини тарк этишга қарор қилдим. Бу қарор заррача ҳиссиётга асосланмаган, аксинча маълум бир мантиқдан келиб чиқади», — дейди у.
«Арманистон» мухолифат фракциясидан бўлган парламент депутати Андраник Теванян Саркисян республикадан чиқиб кетганини маълум қилган. Қатор арман ОАВлари у Лондонда эканини ёзмоқда.
Арманистонда навбатдан ташқари президентлик сайловлари республика конституциясига мувофиқ февраль ўрталарида ўтказилиши мумкин. Республика президентини Миллий Йиғин депутатлари сайлайди.
Маълумот учун, Саркисян 2018 йилда парламент томонидан давлат раҳбари этиб сайланган эди. 2015 йилдаги конституциявий ислоҳотлардан сўнг мамлакат парламентли бошқарув шаклига ўтди. Янги шаклда президент фақат вакиллик ваколатларига эга, унинг ўзи парламент томонидан етти йил муддатга сайланади. Саркисян — дипломат, 1996—1997 йилларда Арманистон ҳукуматини бошқарган, унинг номзоди ўша пайтдаги ҳукмрон Арманистон партияси фракциялари ва унинг коалициядаги ҳамкори — сўл миллатчи «Дашнаксутюн» партияси томонидан кўрсатилган.
Изоҳ (0)