Лига 1 да 1 та гол урган Лионель Месси миллий чемпионатлардаги энг ёмон натижасини кўрсатмоқда

Франция чемпионатининг 22-туридан ўрин олган ўйинда «ПСЖ» ўз майдонида «Реймс»ни мағлуб этди (4:0).

Парижликлар ҳужумчиси Лионель Месси учрашувнинг 63-дақиқасида захирадан майдонга тушди, аммо самарали ҳаракатни амалга ошира олмади.

Аргентиналик футболчи Лига 1 нинг 2021/22 йилги мавсумида 12 та ўйин ўтказиб, атиги битта голга муаллифлик қилди. Ҳужумчининг чемпионат доирасидаги голсиз серияси эса 6 ўйинни ташкил этмоқда.

Шу тариқа 34 ёшли Месси мавсумнинг ушбу босқичида миллий чемпионат ўйинларида урилган голлар сони бўйича фаолиятидаги энг ёмон натижани қайд этди.

Маълумот учун, Месси 2021 йилнинг ёзида эркин агент сифатида «Барселона»дан «ПСЖ»га ўтди ва 2023 йилнинг ёзигача мўлжалланган шартномага имзо чекди. У Лига 1 да 1 та голдан ташқари, 5 та голли узатмани ҳам амалга оширган. Чемпионлар Лигасида эса ўз номига 5 та гол ёздириб қўйган.