O‘zbekiston Superligasi klublari 2022-yilgi mavsumga tayyorgarlik olib bormoqda va yangi futbolchilarni ro‘yxatdan o‘tkazmoqda. Quyida Superliga klublariga doir so‘nggi xabarlar taqdim etiladi.
“OKMK” BAAga jo‘nab ketdi
Toshkentda 5-yanvar kuni to‘plangan va 2 hafta davomida poytaxtda mashg‘ulot o‘tkazgan “OKMK” tayyorgarlikning rejasining uchinchi bosqichini BAAning Dubay shahrida o‘tkazadi.
Klub matbuot xizmatining yozishicha, jamoa Dubayda 20-yanvar—2-fevral kunlari yig‘in o‘tkazib, 2 ta nazorat o‘yinini o‘tkazishni rejalashtirgan.
Shuningdek, “OKMK” yarim himoyachi Shohrux Gadoyev bilan shartnoma uzaytirilganini ma’lum qildi. 2021-yili jamoaga kelgan Gadoyev yana 2 yil davomida Olmaliq klubi sharafini himoya qiladi.
“Navbahor” Gruziya chempionatining 2021-yilgi mavsumdagi to‘purari bilan shartnoma imzoladi
Yangi mavsumga Turkiyaning Antaliya shahrida tayyorgarlik olib borayotgan “Navbahor” yana bir legioner futbolchi bilan shartnoma imzoladi.
Namangan matbuot xizmatiga ko‘ra, serbiyalik hujumchi Zoran Marushich 2022-yilgi mavsumni “Navbahor”da boshlaydi. Biroq 29 yoshli hujumchi bilan necha yillik shartnoma imzolangani haqida ma’lumot berilmagan.
Marushich faoliyati davomida Serbiya, Bosniya va Gersegovina, Belarus hamda Gruziya klublarida to‘p surgan. U 2021-yilgi mavsumni Tbilisining “Dinamo” tarkibida o‘tkazib, 41 ta o‘yinda 17 ta gol 9 ta assistni amalga oshirgan va Gruziya chempionati to‘purari bo‘lgan. Shuningdek, futbolchi o‘tgan mavsumda Gruziya chempionatining eng yaxshi hujumchisi, eng yaxshi legioneri va eng yaxshi futbolchisi deb topilgan.
Transfermarkt portali Marushichni 450 ming yevroga baholagan.
“Paxtakor” Ikrom Aliboyevni o‘z safiga qo‘shib oldi
“Paxtakor” yarim himoyachi Ikrom Aliboyevni o‘z safiga qo‘shib oldi. Aliboyev “sherlar” safiga erkin agent sifatida o‘tdi va bir yillik shartnomaga imzo chekdi.
28 yoshli futbolchi “Paxtakor” jamoasi tarbiyalanuvchisi hisoblanadi. Faoliyati davomida Janubiy Koreyaning “Seul” va “Tejon Sitizen” jamoalarida to‘p surgan. Undan tashqari “Lokomotiv” sharafini ham himoya qilgan.
Superligaga yo‘l olgan “Neftchi” yetakchisi bilan shartnomani uzaytirdi
Ilhom Mo‘minjonov boshchiligida 2022-yilgi mavsumni Superligada boshlaydigan “Neftchi” Sherzod Karimov bilan shartnoma muddatini uzaytirdi.
Ammo Farg‘ona klubi ham shartnoma muddatini oshkor qilmagan.
Sherzod Karimov “Paxtakor”, “Lokomotiv”, “Navbahor”dagi o‘yinlari orqali o‘zbek muxlislariga yaxshi tanish.
Klub matbuot xizmati, shuningdek, jamoa a’zolarining 20-yanvar kuni Turkiyaning Antaliyaga uchib ketganini ma’lum qildi. Farg‘onaliklar u yerda tayyorgarlik jarayonining 21 kundan iborat ikkinchi bosqichiga kirishadi.
Izoh (0)