Тонга ороллари кучли вулқон отилиши ва цунамидан жиддий зарар кўрди, оролдаги бутун бир қишлоқ вайрон бўлди, деб ёзмоқда Reuters.
«Одамлар ваҳимада табиий офатдан қочмоқда, жароҳатлар олмоқда. Қурбонлар сони кўпроқ бўлиши мумкин, биз бундай бўлмаслигини сўраб ибодат қиляпмиз», — деди Австралиядаги Тонга миссияси раҳбарининг ўринбосари Кертис Туихаланги.
Тонга полицияси уч кишининг ўлимини тасдиқлади. Мамлакатда алоқа узилгани туфайли қурбонларнинг ҳақиқий сони номаълум.
Австралиянинг Тинч океани бўйича вазири Зед Сеселянинг айтишича, Тонга расмийлари изоляциядаги Хаапай ороллари гуруҳи ва бошқа чекка ороллардан одамларни эвакуация қила олишга умид қилмоқда.
Тинч океанида сувости вулқони отилганидан сўнг Тонга пойтахти Нукуалофани қисман сув босгани ҳақида хабар берилганди. Мамлакат қироли Тупоу VI қароргоҳидан эвакуация қилинган.
Изоҳ (0)