Коронавирус билан боғлиқ вазият кескинлашгани сабаб Жанубий Корея ҳукумати мамлакатга кириш истагида бўлган йўловчилар учун янги қоидаларни жорий қилди. Бу ҳақда Uzbekistan Airways хабар қилди.
Янги талабларга кўра, 20 январдан бошлаб Корея Республикасига бораётган йўловчилар (6 ёшдан бошлаб) парвоздан камида 48 соат олдин COVID-19 га қарши ПЗР усулда топширилган тестнинг салбий натижасини тақим этиши керак. Тест натижалари инглиз ва корейс тилларига таржима қилиниши лозим.
Аввалроқ Ташқи меҳнат миграцияси агентлиги Жанубий Корея мамлакатга ташриф буюрадиган Ўзбекистон фуқаролари сонини қисқартириши ёки киришни вақтинчалик чеклаши мумкинлигини хабар қилганди. Бунга 2021 йил 23—30 декабрь кунлари жўнаб кетган фуқароларнинг 1 нафарида, 2022 йилнинг 6 январь куни жўнаб кетган 98 нафар фуқаронинг 6 нафарида коронавирус инфекцияси аниқлангани сабаб бўлган.
Эслатиб ўтамиз, Uzbekistan Airways АҚШга киришда қўшимча талаблар қўйилгани сабаб фуқароларни огоҳлантирганди. Унга кўра, йўловчилардан парвоздан камида 24 соат олдин топширилган манфий жавобли ПЗР тести талаб қилинади. Шунингдек, йўловчилар махсус аттестация варақасини тўлдириши ва рўйхатдан ўтиш пайтида уни босма шаклда тақдим этиши шарт.
Изоҳ (0)