Уйчи туманининг собиқ ҳокими Турсунпўлат Мирзамаҳмудов 72 ёшида вафот этди. Бу ҳақда «Дарё» мухбири Азизбек Абдувалиев хабар бермоқда.
Турсунпўлат Мирзамаҳмудов 1950 йили Наманган вилоятининг Уйчи туманида туғилган. 1975 йили Тошкент қишлоқ хўжалиги институтини тамомлаган. Меҳнат фаолиятини 1969 йилда Уйчи туман ўсимликларни ҳимоя қилиш станциясида бошлаган.
1978—1981 йилларда Ўрта Осиё қишлоқ хўжалиги иқтисодиёти илмий-текшириш институти аспиранти, 1981—1990 йилларда Тошкент политехника институти Наманган филиали ассистенти, 1990—1992 йилларда Ўзбекистон компартияси Уйчи туман қўмитаси котиби, ЎзХДП туман кенгаши иккинчи котиби, 1992 йилда Уйчи тумани ҳокими ўринбосари, 1992—1994 йилларда Президент девони референти бўлган.
Турсунпўлат Мирзамаҳмудов 1994—1999 йилларда Уйчи тумани ҳокими бўлиб ишлаганди.
У 1999—2015 йилларда Наманган муҳандислик-педагогика институтида (ҳозирги Наманган муҳандислик-қурилиш институти) самарали фаолият олиб борди, иқтисод фанлари номзоди, профессор илмий унвонларига эга эди.
Турсунпўлат Мирзамаҳмудов 2020 йили «Меҳнат фахрийси» кўкрак нишони билан тақдирланганди.
Изоҳ (0)