Фарғона вилоятининг Қува туманида икки ота фарзандларининг алименти ўрнига хонадонларни берди. Бу ҳақда «Xabar.uz» нашри хабар берди.
Маълум қилинишича, Мажбурий ижро бюросининг Қува тумани бўлими иш юритувида фуқаролик ишлари бўйича Фарғона туманлараро судининг қарорига кўра, қарздор З.Рўзматовдан ундирувчи М.Ботирова фойдасига бир нафар фарзандининг моддий таъминоти учун 1/4 қисм миқдорда алимент ундириш белгиланган.
14 январь куни қарздор ва ундирувчининг ўзаро келишувига асосан З.Рўзматов вояга етмаган бир нафар фарзандининг моддий таъминоти учун у 18 ёшга тўлгунига қадар тўлаши лозим бўлган 86,8 миллион сўм алимент маблағлари ўрнига ўз номида бўлган хонадонни собиқ турмуш ўртоғи М.Ботирова номига нотариус орқали расмийлаштириб топширган.
Шунингдек, бюронинг Қува тумани бўлими иш юритувида фуқаролик ишлари бўйича Фарғона туманлараро судининг қарорига кўра, қарздор О.Ашуровдан ундирувчи Д.Ашурова фойдасига икки нафар фарзандининг моддий таъминоти учун 1/3 қисм миқдорда алимент ундириш белгиланган. 13 январда ўзаро келишувга асосан О.Ашуров вояга етмаган 2 нафар фарзандининг моддий таъминоти учун улар 18 ёшга тўлгунига қадар тўлаши лозим бўлган 88 миллион сўм алимент маблағлари ўрнига ўз номидаги хонадонни нотариус орқали расмийлаштириб берган.
Аввалроқ қўқонлик ота икки фарзанди учун алимент ўрнига хонадон ва Nexia бергани, Наманганда қидирув эълон қилинган қарздорлардан 33 миллион сўмдан ортиқ алимент ундирилгани тўғрисида хабар берилганди.
Изоҳ (0)