Тошкент шаҳрида машинага ўтирган йўловчига куч ишлатиб, унинг пулларини тортиб олган шахслар ушланди, деб хабар беради Тергов департаменти.
Маълум қилинишича, 8 январь куни Андижон вилояти Асака туманида яшовчи 34 ёшли Х.Ж. Яшнобод туман ИИО ФМБ бошлиғи номига мурожаат қилиб, шу куни соат 09:30 да талончилик қурбони бўлганини билдирган. У Тошкент халқаро аэропорти ёнида «водий питак»га бориш учун Lacetti русумли автомашинага ўтиргани, Яшнобод тумани ТҲАЙ кўчасида жойлашган Андижон вилоятига ҳаракатланадиган йўловчи машиналар тураргоҳига етиб келганида ҳайдовчи ва ёнида бўлган йўловчи уни машинадан тушириб, унга куч ишлатиб, жами 800 доллар миқдоридаги пулларини очиқдан очиқ талон-торож қилгани ва ҳодиса содир бўлган жойдан яширинганларини маълум қилиб, уларга нисбатан қонуний чора кўришни сўраган.
Олиб борилган тергов тезкор ҳаракатлари натижасида ушбу жиноятни Тошкент шаҳрида яшовчи 41 ёшли У.С. ва Тошкент вилоятида яшовчи 36 ёшли Ю.А. содир этгани аниқланган.
Ушбу ҳолат бўйича Яшнобод туман ИИО ФМБ ҳузуридаги Тергов бўлими томонидан У.С. ва Ю.А.га нисбатан Жиноят кодексининг 166-моддаси 2-қисми «в» банди (талончилик) билан жиноят иши қўзғатилган. Ҳозирда гумонланувчилар процессуал тартибда ушланган. Тергов ҳаракатлари давом эттирилмоқда.
Бундан аввал Андижонда икки шахсга зўрлик ишлатиб, пули ва телефонини олиб қўйган аёл ушлангани, Бухорода ўзига нотаниш фуқарога спиртли ичимлик ичишни таклиф қилиб, уни дўппослаган ва тунаган шахсга суд ҳукми ўқилгани ҳамда Фарғонада маҳалладаги танишининг олдига келган йигитни қизларнинг олдига келганликда айблаб, уриб, «ечинтириб кетган»лар қўлга олингани ҳақида хабар берилганди.
Изоҳ (0)