Ўзбекистонда «1hls» платформасида кунига 10 минг қадам юрганларга 3 минг сўмдан бериш тўхтатилди

«Соғлом турмуш тарзи» (www.1hls.uz) платформасида 2022 йил 16 январдан бошлаб 3 минг сўм пул маблағ бериш тизими тўхтатилади. Бу ҳақда Туризм ва спорт вазирлиги маълум қилди.

Таъкидланишича, мутахассислар ва жамоатчилик таклифларига асосан, аҳолини янада кўпроқ кунлик юриш ва югуришга жалб қилиш мақсадида рағбатлантириш тизимини ўзгартириш, 3 минг сўм ўрнига каттароқ совринлар қўйиш мақсадга мувофиқ, деган хулосага келинган.

Шунга кўра, «www.1hls.uz» платформаси орқали қуйидаги ўзгаришлар амалга оширилади:

1) Ўзбекистон ҳудудида бир сутка давомида ўн минг ва ундан ортиқ қадам юрган 18 ва ундан юқори ёшдаги аҳолини янада кўпроқ рағбатлантириш йўлга қўйилади. Бунда ҳар ҳафта якунлари бўйича иштирокчилар ўртасида қуйидаги совринлар ўйналади:

• 1 кишига 100 миллион сўм миқдорида пул мукофоти;
• 1 000 кишига велосипед.

3) Шаффофлик ва холисликни таъминлаш, турли қинғир йўллар орқали сохта натижаларни қайд этишга йўл қўймаслик мақсадида жамоатчилик фаоллари, IT-мутахассислар, журналист ва блогерлардан иборат Жамоатчилик назорати кенгаши ташкил этилади ҳамда барча жараёнлар устидан қатъий назорат олиб борилади. Бунда Жамоатчилик назорати кенгашига Олий Мажлис Қонунчилик палатаси депутати Расул Кушербаев раислик қилади, ҳуқуқшунос Хушнуд Худойбердиев ҳамда блогер Никита Макаренко раис ўринбосарлари этиб белгиланди;

4) Юқоридаги тартиб ишга туширилиши муносабати билан 2022 йил 16 январдан бошлаб, «www.1hls.uz» платформаси орқали бир сутка давомида ўн минг ва ундан ортиқ қадам юрган фуқароларга 3 минг сўм пул маблағи бериш тизими тўхтатилади;

5) 2022 йил 15 январга қадар ушбу платформа орқали тегишли талабларни бажарган ва электрон ҳамёнига белгиланган маблағларни тўплаган барча фуқароларга ушбу тўловлар амалга ошириб берилади.

«Юқоридаги рағбатлантириш тизими ҳақидаги батафсил маълумотлар тез орада Туризм ва спорт вазирлигининг расмий саҳифаларида ҳамда оммавий ахборот воситаларида эълон қилинади», — дейилади вазирлик хабарида.