Наманганда 2021 йили 11 киши оқланди ва 380 нафар фуқаро суд залида қамоқдан озод қилинди. Бу ҳақда вилоят суди раисининг ўринбосари, жиноят ишлари бўйича судлов ҳайъати раиси Адҳамжон Мирзаев маълум қилди, дея хабар беради «Дарё» мухбири Азизбек Абдувалиев.
«2021 йили 1258 нафар шахсга нисбатан енгилроқ жазо тайинланди, 115 киши эса шартли ҳукм қилинди. Шунингдек, 1279 нафар фуқаро тарафларнинг ярашганлиги муносабати билан жиноий жавобгарликдан озод қилинди, 1,5 мингдан ортиқ киши жазони ўташдан муддатидан илгари шартли озод қилинди», — дейди Мирзаев.
Наманганда 2021 йили маҳалла фуқаролар йиғинлари кафиллиги асосида 37 нафар шахсга нисбатан 30 та жиноят иши бўйича озодликдан маҳрум қилиш билан боғлиқ бўлмаган жазо тайинланган.
Адҳамжон Мирзаевнинг қайд этишича, шу билан бирга, вилоятда судлар томонидан қўлланган енгилликни суистеъмол қилаётганлар сони ҳам салмоқлилигича қолмоқда. Наманганда ўтган йил давомида жами судланган шахсларнинг 990 нафари ёки 25,1 фоизини такроран жиноятга қўл урган ва муқаддам судланган шахслар ташкил этган.
Изоҳ (0)