Ҳиндистонга даволанишга борган сурхондарёлик эркакни ватандоши чув туширди

Ҳиндистонга даволаниш учун борган ўзбекистонликни юртдоши чув туширди, деб хабар берилди «Янги давр» кўрсатувида.

Қайд этилишича, Сурхондарё вилояти Ангор туманида яшовчи О.Т. 2021 йил бошида жигар церрози билан оғриган. Турмуш ўртоғи эса унга ўз жигарини бермоқчи бўлган. Улар қариндош-уруғининг моддий ёрдамидан ташқари, ер участкаларини сотиб, соғлиғини тиклаш учун Ҳиндистонга борган.

«6 июль куни бордик. Ҳамма анализларни топширдик. Шу пайт коронавирусга чалиниб қолдим, оғир аҳволда ўтди. 25 кун ‘постелний’ режимда ётдим», — дейди эркак.

Улар коронавирусдан даволангани учун хориждаги касалхонадан 250 миллион сўм қарз бўлиб қолган. Ўзларида имкон йўқлиги сабаб жамоатчиликдан моддий ёрдам сўраган. Бу орқали ҳисобига 6 миллион сўм тушади.

«Бир куни ўзини И. деб таништирган шахс телефон қилди. Сизларга ёрдам бераман, операция харажатларини тўлайман, деди. Фақат фоизини тўлаб беришимиз керак экан, 14 миллион сўм сўради. Бизда эса 6 миллион сўм бор эди, холос. Шу пулни пластик картасига ўтказиб беришга келишдик. У эса душанба куни 250 миллион сўм беришини айтди. Пулни ўтказдим. У эса телефонини ўчириб олди», — деган жабрланувчи.

Олиб борилган тезкор тадбирда ўзини И. деб таништирган шахс аслида Самарқанд вилояти Иштихон тумани «Чордара» маҳалласида яшовчи, ишсиз Ў.Ш. (1992 йилда туғилган) экани аниқланган. Унга нисбатан Жиноят кодексининг 168-моддаси (фирибгарлик) 1-қисми билан жиноят иши қўзғатилган.