2021 йилнинг ноябрида Тошкент шаҳрида Golden Cash Store МЧЖ шаклидаги хорижий корхона таъсис этиб, фуқароларга 260 фоизгача фойда кўришини ваъда қилган шахслар ушлангани тўғрисида хабар берилганди. ИИВ Тергов департаментининг ўта муҳим ишлар бўйича терговчиси Маъмуржон Раҳматуллаев ОАКАда бўлиб ўтган матбуот анжуманида Golden Cash Store молиявий пирамидаси билан боғлиқ жиноят иши тафсилотларини маълум қилди, деб хабар беради «Gazeta.uz».
Унинг сўзларига кўра, 2020 йил 15 январида икки нафар Украина ва уч нафар Тожикистон фуқароси Тошкентда корхона ташкил этади.
Golden Cash Store компанияси ҳужжатларда улгуржи савдо билан шуғулланиши кўрсатилган бўлишига қарамасдан, амалда Ўзбекистон фуқароларига олтин ва кумуш буюмларини сотиб, уларнинг пулларини корхонага ишлаб чиқариш учун сармоя киритиш таклиф қилинган. Таъсисчилар ижтимоий тармоқлар ва ОАВда ўз фаолиятларини жадал тарзда реклама қилишган.
«Ушбу компания фаолияти нима учун бизда қизиқиш туғдирди? Ушбу жамият фаолиятида ҳеч қандай ташқаридан келадиган даромади ёки ташқи инвесторлари мавжуд эмас. Булар фаолияти ташкил қилинган пайтидан бошлаб гўёки фуқаролардан олинган ҳар битта тилла тақинчоқ ва пул маблағларини Тожикистондаги мавжуд тилла конларига инвестиция сифатида киритиб, уларни кўпайтириш билан қизиқтириб келган. Ва бу ҳолатлар фақатгина оғзаки равишда бўлган», — деди терговчи.
«Улар биринчи келган мижозлардан қабул қилган пул маблағларининг асосий қисмини ўзларида олиб қолиб, кейинги мижозлар тиккан пулларни олдингиларга тўлаб беришган», — деди Маъмуржон Раҳматуллаев.
Унинг сўзларига кўра, келишувда форс-мажор ҳолатлари ёки шартларнинг бузилиши натижасида етказилган зарарни ким ва қандай маблағлар ҳисобидан қоплаши кўрсатилмаган.
Бундан ташқари, мижозлар Gold, Platinum тоифаларига ажратилиб, уларга қимматбаҳо совғалар, iPhone ва автомобиль ваъда қилинган, бироқ якунда фуқаролар ҳеч нарса олишмаган.
«Натижада бир неча минг фуқаро ташкилотчиларнинг таклифларини қабул қилиб, уларга қиймати 100 мингдан 10 минггача бўлган олтин ва кумуш буюмлар, шунингдек, бошқа мол-мулкни топширган», — деб ёзади Spot.
Жабрланганларнинг аксарияти Тошкент, Фарғона, Андижон, Наманган, Қашқадарё, Бухоро, Хоразм вилоятлари, шунингдек, Қорақалпоғистон аҳолисидир. Бундан ташқари, фирибгарлар қўшни МДҲ давлатларида ҳам фаолият юритишган. Молиявий пирамидадан азият чеккан андижонлик фуқаро уйини сотиб 10 минг 700 доллар сармоя киритганини айтган.
Мазкур ҳолатлар асосида Golden Cash Store таъсисчиларига нисбатан 2021 йил 17 ноябрь куни Тошкент шаҳар ИИББ томонидан Жиноят кодексининг 188−1-моддаси 2-қисми «б, в, д» бандлари (пул маблағларини ва (ёки) бошқа мол-мулкни жалб этишга доир ноқонуний фаолият такроран ёки хавфли рецидивист томонидан, бир гуруҳ шахслар томонидан олдиндан тил бириктириб, ОАВдан ёхуд телекоммуникация тармоқларидан, шунингдек Интернет жаҳон ахборот тармоғидан фойдаланиб) жиноят иши қўзғатилган. Айбланувчилар ҳозир ҳибсда.
Golden Cash Store ҳудудий филиалларида ўтказилган текширувлар давомида 830 та компанияга тегишли шартнома ва ҳужжатлар, 54 та компания ҳужжатлари, 4699 та Golden Cash Store пластик карточкалари, 2439 та реклама буклетлари, 443 та эркаклар ва аёллар учун кумуш буюмлар, 22 та банк картаси ва бошқалар аниқланган.
Шунингдек, компания таъсисчиларининг 1 миллиард 128 миллион сўм пул маблағлари ҳамда ҳисобварақлардаги 63,2 миллион сўм музлатиб қўйилди. Жамият раҳбари ўз картасига ҳам 2,4 миллиард сўм ўтказган.
Мавзуга доир:
- Қашқадарёда сохта акцияларни 9 млн долларга пуллаб, молиявий пирамида ташкил этган шахсларга жиноят иши қўзғатилди
- Тошкентда тадбиркорни 1 млрд сўмга чув туширган шахсга жиноят иши қўзғатилди
- Андижонда ўзини Испания банки вакили дея таништириб, 200 минг доллар кредит олиб бериш учун пул талаб қилган шахс ушланди
Изоҳ (0)