Ўзбекистонда кетма-кет бешинчи кун коронавирусга чалиниш ҳолати ортди — яна 714 кишида касаллик тасдиқланди

Ўзбекистонда кетма-кет бешинчи кун касалланишлар сони ортди — сўнгги суткада 710 нафардан ортиқ кишида коронавирус аниқланди, деб хабар бермоқда Соғлиқни сақлаш вазирлиги матбуот хизмати.

Қайд этилишича, 12 январь куни 714 кишида касаллик тасдиқланиб, Ўзбекистонда коронавирус инфекцияси қайд этилганлар сони 202473 нафарни ташкил этмоқда.

Янги касалланиш ҳолатларининг:

• 12 нафари Қорақалпоғистон Республикасида,
• 11 нафари Андижон вилоятида,
• 6 нафари Бухоро вилоятида,
• 51 нафари Жиззах вилоятида,
• 29 нафари Қашқадарё вилоятида,
• 4 нафари Навоий вилоятида,
• 9 нафари Наманган вилоятида,
• 39 нафари Самарқанд вилоятида,
• 12 нафари Сирдарё вилоятида,
• 6 нафари Сурхондарё вилоятида,
• 14 нафари Фарғона вилоятида,
• 25 нафари Хоразм вилоятида,
• 109 нафари Тошкент вилоятида,
• 387 нафари Тошкент шаҳрида

Шу кун давомида 228 киши: Қорақалпоғистон Республикасида 4 нафар, Андижон вилоятида 12 нафар, Бухоро вилоятида 4 нафар,  Жиззах вилоятида 26 нафар, Қашқадарё вилоятида 20 нафар, Навоий вилоятида 2 нафар, Наманган вилоятида 1 нафар, Самарқанд вилоятида 21 нафар, Сирдарё вилоятида 11 нафар, Фарғона вилоятида 13 нафар, Хоразм вилоятида 15 нафар, Тошкент вилоятида 31 нафар, Тошкент шаҳрида 68 нафар бемор тузалиб, касалликдан соғайганлар жами 197703 нафарга етди ва соғайиш кўрсаткичи 98 фоизни ташкил этмоқда.

Шунингдек, 3 нафар коронавирусга чалинган бемор вафот этиб, касалликдан вафот этганлар сони 1508 нафарни ташкил қилди.

Эслатиб ўтамиз, 7 январь куни Ўзбекистонда коронавируснинг омикрон штамми аниқланганди. Шундан буён коронавирусга чалинганлар сони орта бошлади. 8 январь куни 369 кишида, 9 январда 389 кишида, 10 январда 425 кишида, 11 январда 604 кишида касаллик тасдиқланди.

Шу сабабли Республика махсус комиссиясининг қарори билан 15 январдан бошлаб мамлакатда бир қатор чекловлар жорий этилади. Жумладан, турли тадбирлар ташкил этиш тақиқланади, эмланмаган ходимлар ишга қўйилмайди. Олий таълим муассасалари талабалари ўртасида таътил давомида коронавирус инфекциясига қарши тўлиқ эмлаш чоралари кўрилади.