3 январь куни Энергетика вазирлиги штаби томонидан ўтказилган тадбир давомида Жиззах вилоятининг Шароф Рашидов тумани «Хайробод» МФЙ ҳудудида яшовчи фуқаро Қ.Б.га тегишли хонадонда табиий газдан ноқонуний фойдаланган ҳолда оҳак ишлаб чиқараётгани маълум бўлди. Бу ҳақда Энергетика вазирлиги матбуот хизмати хабар берди.
Ушбу ҳолатда дастлабки ҳисоб-китобларга кўра 22 минг 809 куб метр табиий газдан ноқонуний фойдаланилгани аниқланган. Мазкур ҳажмдаги табиий газ ўртача 1 500 та хонадоннинг бир кунлик истеъмолини ташкил қилади.
Шунингдек, 5 январь куни ўтказилган тадбирда Шароф Рашидов тумани «Хайробод» МФЙ ҳудудида яшовчи фуқаро Қ.М.га тегишли хонадонда ҳам табиий газдан ноқонуний фойдаланилгани маълум бўлган. Бунда фуқаро 57 минг куб метр табиий газдан ноқонуний равишда фойдалангани аниқланган.
Мазкур ҳажмдаги табиий газ ўртача 3 000 та хонадоннинг бир кунлик истеъмолини ташкил қилади.
Бундан ташқари, ўтган ойда ўтказилган тадбирда Жиззах шаҳри «Сулоқли» МФЙ, Тошкент кўчасида фаолият юритаётган «Мафтуна шарафжон» МЧЖга қарашли оҳак ишлаб чиқариш цехида ҳам табиий газдан ноқонуний фойдаланиш ҳолати аниқланган.
Унда мазкур МЧЖ томонидан 2 дона айланма оҳак печи ўрнатган ҳолда дастлабки ҳисоб-китобларга кўра, 205 минг куб метр табиий газдан ноқонуний фойдаланилган ва газ таъминоти корхонасига 205 миллион сўм зарар етказилган. Мазкур ҳажмдаги табиий газ ўртача 12 000 та хонадоннинг бир кунлик истеъмолини ташкил қилади.
Юқорида қайд этилган ноқонуний ҳолатлар бўйича расмийлаштирилган ҳужжатлар чора кўриш учун ҳуқуқни муҳофаза қилиш органларига топширилган.
Аввалроқ Самарқанд вилоятидаги газ заправка 5,4 миллиард сўмлик газ ўғирлагани аниқлангани, Навоийда оҳак ишлаб чиқариш корхонаси газдан ноқонуний фойдаланиб, 295 миллион сўм зарар етказгани тўғрисида хабар берилганди.
Изоҳ (0)