Abdulaziz Komilov 11-yanvar kuni videokonferensaloqa shaklida Turkiy davlatlar tashkiloti tashqi ishlar vazirlari kengashining navbatdan tashqari yig‘ilishida ishtirok etdi. Bu haqda Tashqi ishlar vazirligi xabar qildi.
Qayd etilishicha, Ozarbayjon, Qirg‘iziston, Qozog‘iston, Turkiya, O‘zbekiston, Vengriya va Turkmaniston tashqi ishlar vazirliklari rahbarlari Qozog‘istondagi mavjud vaziyatni muhokama qilgan.
Tashkilot a’zolarining Qozog‘iston xalqi va rahbariyatini qat’iy qo‘llab-quvvatlashi va birdamligi ta’kidlangan. Tez orada mamlakatda tinchlik va barqarorlik o‘rnatilishiga ishonch bildirilgan.
Yig‘ilish yakunlari bo‘yicha qo‘shma bayonot qabul qilingan.
Ma'lumot uchun, Qozog‘istondagi vaziyat 2-yanvar kuni Janao‘zen shahrida (Mang‘istov viloyatidagi shahar) suyultirilgan gaz narxining ikki baravar oshishiga qarshi mitinglar boshlanganidan so‘ng keskinlashdi. Chiqishlar iqtisodiy va siyosiy talablar bilan butun mamlakat bo‘ylab ommaviy norozilik namoyishlariga aylanib ketdi. 4 va 5-yanvar kunlari Olmaotada namoyishchilarning xavfsizlik xodimlari bilan to‘qnashuvi kuzatildi. Qozog‘iston prezidenti Qosim-Jo‘mart To‘qayev mamlakatdagi ommaviy tartibsizliklar paytida halok bo‘lganlar va jarohatlanganlar borligini aytgan.
6-yanvarda Kollektiv xavfsizlik shartnomasi tashkiloti (KXShT) tinchlikparvar kuchlari Qozog‘istonga jo‘natdi. 7-yanvarda To‘qayev Qozog‘istonda konstitutsiyaviy tartib tiklanganini e’lon qildi va mamlakat bo‘ylab terrorchilik xavfining yuqori darajasi joriy etildi. Qozog‘iston IIV 4000 nafarga yaqin terrorchi hibsga olinganini ma’lum qildi
Avvalroq Shavkat Mirziyoyev Turkiya prezidenti Rajab Toyyib Erdo‘g‘on, Qosim-Jo‘mart To‘qayev va Emomali Rahmon bilan telefon orqali muloqot qilib, Qozog‘istondagi vaziyatni muhokama qilgandi.
Izoh (0)