Женевада АҚШ ва Россия музокараларининг биринчи раунди бўлиб ўтди

Женевада 9 январь куни АҚШ ва Россия ўртасидаги «хавфсизлик кафолатлари» бўйича бир қатор музокараларнинг биринчи раунди бўлиб ўтди. Бу ҳақда «Интерфакс» хабар берди.

Музокаралар АҚШ давлат департаменти раҳбарлигида ўтказилди. Россия делегациясига ташқи ишлар вазири ўринбосари Сергей Рябков бошчилик қилди.

Сергей Рябков Женевада ўтган учрашувни АҚШ билан 10 январга белгиланган хавфсизлик кафолатлари бўйича музокаралар олдидан қийин, аммо ишбилармонлик руҳида ўтган учрашув деб баҳолади.

«Ажойиб. Суҳбат оғир, аммо ишчан руҳда бўлди. Ўйлайманки, эртага вақтимизни беҳуда ўтказмаймиз», — деди Россия вакили.

Юқорида таъкидланганидек, музокаралар мавзуси Европадаги хавфсизлик масалалари бўлган. Рябков ҳамкасби билан икки соатдан ортиқ суҳбатлашган. Учрашув АҚШнинг Қуролсизланиш бўйича конференциядаги доимий вакили қароргоҳида бўлиб ўтган.

Европада хавфсизлик кафолатлари бўйича музокаралар 2021 йилнинг сўнгги ойларида бошланди. Россия Ташқи ишлар вазирлиги АҚШ ва НАТО билан келишув лойиҳаларини эълон қилди. Россия томони бошқа нарсалар қатори НАТОдан шарққа томон кенгаймасликни ҳамда Украинани альянсга қўшилишдан четлаштиришни сўраган.

2022 йил 10 январь, душанба куни НАТО бош котиби Йенс Столтенберг Украина бош вазирининг Европа интеграцияси бўйича ўринбосари Олга Стефанишинани қабул қилади.

«Бош вазир ўринбосари Стефанишина НАТО бош котиби раислигида ўтадиган НАТО—Украина комиссиясининг йиғилишида иштирок этади», — дейилади альянс сайтидаги пресс-релизда.

Учрашувдан сўнг бош котиб ва ​​Украина бош вазири ўринбосари қўшма матбуот анжумани ўтказади, дейилади хабарда. НАТО—Украина учрашуви бир қатор йиғилишлар олдидан бўлиб ўтмоқда: 10 январда Женевада Россия—АҚШ, 12 январда Россия—НАТО ва 13 январда Брюсселда Россия—ЕХҲТ учрашувлари режалаштирилган. Музокараларнинг асосий мавзуларидан бири Украина масаласи бўлади.

Аввалроқ Столтенберг Россия билан хавфсизлик масалаларининг баъзилари бўйича муросага келиш мумкинлигини, бироқ уларга битта учрашувда эришиб бўлмаслигини айтган.

«Биз муносабатларни яхшилаш устида ишлашга тайёрмиз», — деган у Financial Times нашрига.

«Биз Россия билан муроса қилиш ва муаммоларни ҳал қилиш йўлларини топишимиз мумкинлигини илгари исботлаганмиз, бунинг учун бир эмас, балки бир қатор учрашувлар зарур бўлади», — дея қўшимча қилган бош котиб.

Шу билан бирга, у НАТО «очиқ эшиклар» тамойилидан воз кечиш ниятида эмаслиги, яъни ҳар қандай давлат, жумладан, Украина ҳам альянсга кириш учун ариза топшириши мумкинлигини яна бир бор эслатди.