АҚШ ўз иттифоқчилар билан биргаликда Россия Украинага бостириб кирган тақдирда унга қарши қўллаш учун янги санкциялар пакетини тайёрламоқда. Бу ҳақда The New York Times (NYT) америкалик амалдорларга таяниб хабар берди.
Манбаларнинг сўзларига кўра, муҳокама қилинган чекловлар Россия ҳарбийлари Украинага бостириб кирганидан бир неча соат ўтиб кучга киради. Расмийлар Россия ва Ғарб давлатлари ўртасида келаси ҳафтага мўлжалланган бир қатор дипломатик музокаралар олдидан илк бор санкциялар пакетининг тафсилотларини эълон қилди, дея таъкидлаган NYT.
Газетанинг ёзишича, сўнгги кунларда АҚШ ўз иттифоқчилари билан Россиянинг энг йирик молия институтларини халқаро банк/тўлов тизимларидан узиб қўйиш, мудофаа ва истеъмол саноати учун зарур бўлган Америка маҳсулотларининг экспортига эмбарго жорий этиш масалаларини, шунингдек, Россия кучларига қарши «партизан уруши» олиб борадиган украиналик исёнчиларни қуроллантириш стратегиясини муҳокама қилган.
Маълумот учун АҚШда ишлаб чиқарилган маҳсулотларнинг экспортига эмбарго киритилган мамлакатлар рўйхатига ҳозирда Эрон, Шимолий Корея, Куба ва Сурия киради.
«Технологик санкциялар Россия президенти Владимир Путиннинг севимли тармоқларига, хусусан, Россия ҳукуматининг асосий даромад манбалари бўлган авиация ва ҳарбий соҳаларга таъсир қилади», — деб ёзган газета.
NYT маълумотларига кўра, санкциялар биринчи навбатда Россиянинг муҳим саноат тармоқларига, жумладан, мудофаа ва фуқаро авиацияси соҳаларига қаратилган бўлиши мумкин, бу Россиянинг юқори технологияга, жумладан сунъий интеллект ёки квант ҳисоблашларга оид амбицияларига путур етказади.
Нашрнинг қайд этишича, кўриб чиқилаётган чекловлар компьютер чиплари сотувига шунчаки тақиқ қўйиш эмас. Қўшимча қадам сифатида АҚШ Савдо вазирлиги мамлакатда ишлаб чиқарилган ёки бутловчи қисмлари АҚШдан келтириладиган ҳар қандай истеъмол товарлари — мобил телефонлар ва ноутбуклардан тортиб музлатгич ва кир ювиш машиналаригача — Россияга экспорт қилишни самарали тақиқловчи фармон чиқариши мумкин, дея таъкидлаган америкалик амалдорлар.
«Бу қоидалар нафақат АҚШдаги ишлаб чиқарувчиларга, балки Америка чиплари ёки дастурий таъминотидан фойдаланадиган Европа, Жанубий Корея ва бошқа хорижий ишлаб чиқарувчиларга ҳам тегишли бўлади», — дея қайд этган газета.
Украина билан чегарада Россия қўшинларининг тўплангани ҳақидаги маълумотлар октябрь ойида Ғарб ОАВларида пайдо бўлишни бошлаган. Ноябрь ойи ўрталарида Украина президенти Владимир Зеленский чегарада 100 минг Россия қўшини борлигини маълум қилган. АҚШ Давлат котиби ўринбосари Виктория Нуланд Россиянинг Украинага «бостириб кириши» 2022 йил бошида содир бўлиши мумкинлигини айтган.
Москва бу маълумотларни рад этиб, Украинадаги ҳарбий ҳаракатларга тайёргарлик ҳақидаги хабарларни «қуруқ, асоссиз кескинлик» деб атамоқда. Қолаверса, Россия Ғарб давлатларидан НАТОнинг шарққа томон кенгаймаслиги, Украина эса бу ташкилотга қабул қилинмаслиги ҳақида кафолат талаб қилди.
Украина атрофидаги вазият 7 декабрь ва 30 декабрь кунлари Россия ва АҚШ президентлари Владимир Путин ва Жо Байден ўртасидаги онлайн ҳамда телефон орқали музокараларда муҳокама қилинган эди. Байден Путинни Россия Украинага бостириб кирган тақдирда «кескин иқтисодий ва бошқа чоралар» ҳақида огоҳлантирган.
АҚШ ОАВлари Москвага қарши санкциялар пакети Россияни SWIFT банклараро ўтказма тизимидан узиб қўйиш ва рублни бошқа валюталарга конвертация қилиш бўйича чекловларни ўз ичига олиши ҳақида хабар берган.
Путин билан сўнгги музокарадан сўнг Байден Зеленский билан гаплашишга қарор қилди. Суҳбат 2022 йилнинг 2 январида бўлиб ўтди. Унда Байден Зеленскийни Россия Украинага бостириб кирадиган бўлса, Вашингтон ва унинг иттифоқчилари бунга қатъий жавоб беришга тайёр эканига ишонтирди.
Изоҳ (0)