Кипрда «дельта» ва «омикрон» штаммларининг гибриди аниқланди

Кипрда маҳаллий олимлар коронавируснинг янги нусхаси пайдо бўлганини маълум қилди. Бу ҳақда «РБК» хабар берган.

Кипр университети профессо Леонтиос Кострикис Sigmalive телеканалига берган интервьюсида штаммнинг 25 та намунада аниқлангани, унинг генетик асоси «дельта» ҳамда бир вақтнинг ўзида «омикрон» хусусиятларига эгалигини қайд этган. Вируснинг янги тури «дельтакрон» номини олган.

«Биз бошқа штаммлардан кескин фарқ қилувчи «омикрон»га ўхшаш бир қатор мутацияларни топдик, унинг геноми 30 хил турли мутацияларга эга. Улар орасида 10 таси юқорида эслаб ўтилган намуналарда аниқланган», — дея тушунтириш берган олим.

«Дельтакрон» аниқланган 25 кишидан 11 нафари касалхонага ётқизилган ва шифокорлар назорати остида даволанмоқда.

Олимнинг сўзларига кўра SARS-CoV-2 нинг янги вариант қай даражада юқумли эканлиги борасида бир нима дейиш қийин, бироқ унинг тахмин қилишича штамм беморни безовта қилмайди ва уни «омикрон» организмдан чиқариб ташлайди.

Коронавируснинг янги — B.1.1.529 тури — илк бора 2021 йил ноябрь ойида Жанубий Африкада аниқланган. Жаҳон соғлиқни сақлаш ташкилоти мазкур штаммни безовталик чақириш хусусиятига эгалигини қайд этиб, унга «омикрон» номини берган. ЖССТ маълумотларига кўра мазкур штамм билан касалланиш ҳолатлари 100 дан ортиқ мамлакатларда кузатилган.

ЖССТ бош директори Тедрос Адхан Гебрейесус 2021 йил декабрь ойида «омикрон»нинг аввалги штаммларга нисбатан тезроқ тарқалаётгани, коронавирусга қарши эмланганлар ҳам, аввал касалланиб тузалганлар ҳам уни юқтириб олаётганини таъкидлаган.

Аввал бутун дунёда коронавирусга чалинганлар сони 300 миллиондан ошгани, Ҳиндистонда «омикрон» штаммидан биринчи ўлим қайд этилгани, Италияда 50 ёшдан ошганлар учун COVID-19 га қарши мажбурий эмлаш жорий қилингани, Жанубий Кореяда «омикрон» билан боғлиқ дастлабки ўлим ҳолатлари кузатилгани ҳақида хабарлар берилган.