Покистоннинг Панжоб вилоятидаги Мурри шаҳрида кучли қор ёғиши ва бўрон бошланиши оқибатида автомобиллар ичидаги одамлар совуқда қолиб кетди ва 20 нафардан зиёд киши ҳалок бўлди. Бу ҳақда BBC хабар тарқатган.
Маҳаллий ҳукумат вакиллари 21 нафар одамнинг қор ва совуқ ҳаво туфайли ҳалок бўлгани, мингга яқин автомобиль қор остида қолиб кетганини тасдиқлаган. Айни вақтда шаҳар фалокат ҳудуди деб эълон қилинган.
Қайд этилишича, бир неча кун ичида кучли қор бўронини кўриш учун Муррига 100 мингдан зиёд автомобилларда минглаб сайёҳлар келган.
Аввал Японияда рекорд даражадаги қор бўронлари кузатилгани, 3200 дан зиёд оила электр таъминотидан узилиб қолгани, Токионинг ўзида 200 нафардан зиёд одам жабрлангани, ҳукумат фуқароларга зарурат бўлмаганида уйдан чиқмасликни тавсия этгани ҳақида хабар берилганди.
Шунингдек, 2021 йил декабрь охирида Туркияда ҳам тоғли ҳудудлардаги қишлоқ уйлари қор остида қолган. Тор кўчалардан қишлоқлар ҳудудига махсус техникани ўтказишнинг имкони йўқлиги, маҳаллий аҳоли белкураклар билан ўз уйларини қор остидан чиқаришни бошлаган.
Изоҳ (0)