Бухоро вилояти Когон шаҳар ички ишлар бўлими томонидан жами 24 миллион 200 минг сўмлик пул ва техник воситалар ўғирлангани аниқланган. Бу ҳақда «Дарё»га хабар берган вилоят ИИБ бошқармаси матбуот хизматининг ёзишича, ўғриларнинг хатти-ҳаракати хизмат ити томонидан фош қилинган.
Таъкидланишича, Когон шаҳар Бухорошоҳ кўчасида жойлашган Silver study konsult МЧЖ раҳбарининг хизмат хонасида номаълум шахс томонидан ўғрилик содир этилган ва у воқеа жойидан яширинган.
Ўрганишларга кўра, номаълум шахс жамият раҳбари Р.Б.га тегишли бўлган баҳоси 2 миллион 500 минг сўмлик Lenovo русумли ноутбук, 300 минг сўмлик видеокузатув мосламаси ва унинг хотираси ҳамда 21 миллион 400 минг сўм пулларни ўғирлаган ва жами 24 миллион 200 минг сўмлик моддий зарар етказган.
Жамият раҳбарининг аризасига кўра, ҳодиса содир бўлган жойга тергов тезкор гуруҳи етиб борган.
Таркибдаги ходимлар орасида бўлган кинолог Талъат Остонов ўз тарбиясидаги Лорд лақабли хизмат ити ёрдамида тезкор қидирув ҳаракатларини олиб борган. Хизмат ити номаълум шахсга тегишли из ва ҳид билан боғлиқ ашёвий далилларни топган.
«Лордда сезувчанлик ва сезгирлик хислатларининг юқорилиги натижасида жиноятни содир қилган шахс Когон туманидаги «Беклар» маҳалласида яшовчи фуқаро И.И. (1999 йилда туғилган) экани фош этилди. У ашёвий далиллар билан қўлга олинди», — дейди Шуҳрат Жалолов.
Мазкур ҳолат юзасидан И.И.га нисбатан Жиноят кодексининг 169-моддаси (ўғрилик) 2-қисми билан жиноят иши қўзғатилган ва айни пайтда дастлабки тергов ҳаракатлари олиб борилмоқда.
Изоҳ (0)