Россиянинг Ленинград вилоятида 5 январь куни Daewoo Nexia ва тез ёрдам машинаси тўқнашиб кетди. Бу ҳақда «78.ru» хабар қилмоқда.
Қайд этилишича, йўл-транспорт ҳодисаси шу куни соат 19:23 да М-10 автомагистралининг 637-километрида содир бўлган. Ўзбекистон фуқароси (1995 йилда туғилган) Nexia автомобилини бошқариб бораётиб, қарама-қарши йўлакка чиқиб кетган ва Ford Transit машинасига бориб урилган.
Оқибатда машина ичидаги йўловчи (1991 йилда туғилган) воқеа жойида, бошқа бир йўловчи (1995 йилда туғилган) шифохонага олиб кетилаётганда вафот этган. Қурбонларнинг иккиси ҳам Ўзбекистон фуқаролари бўлган. Шунингдек, тез ёрдам фелдшери (1977 йилда туғилган) ўртача оғирликдаги тан жароҳати билан касалхонага ётқизилган.
Қайд этилишича, Nexia ҳайдовчиси 2021 йилда ҳам йўл ҳаракати қоидаларини бузгани учун икки марта маъмурий жавобгарликка тортилган.
Ҳайдовчи қўлга олиниб, изоляторга жойлаштирилган. Унга нисбатан жиноят иши қўзғатилган. Ҳозирда ҳолат юзасидан тергов ҳаракатлари олиб борилмоқда.
Изоҳ (0)