O‘zbekiston hukumati o‘quv dasturlari va darsliklarni yangilashni rejalashtirmoqda. Bu haqda Yangi O‘zbekistonning 2022/2026-yillarga mo‘ljallangan Taraqqiyot strategiyasi va uni 2022-yilda amalga oshirish bo‘yicha “yo‘l xaritasi” loyihasida so‘z boradi.
Oliy Majlis Qonunchilik palatasining ma’lum qilishicha, 2026-yilga qadar o‘quv dasturlari va darsliklarni ilg‘or xorijiy tajriba asosida to‘la qayta ko‘rib chiqiladi. Milliy o‘quv dasturiga asosan 2026-yilga qadar 699 nomdagi, shu jumladan, 2022-yilda 296 nomdagi yangi darsliklar, mashq daftarlari, o‘qituvchi metodika kitoblari hamda mobil ilovalarni yaratiladi.
Hujjat loyihasida Milliy o‘quv dasturi bo‘yicha yangi metodikalarga o‘qituvchilarni o‘qitish maqsadida Elektron malaka oshirish platformasi uchun 2026-yilga qadar jami 769 ta videodars yaratilishi, ayniqsa, darslik va o‘quv-metodik majmualarni tajriba-sinovdan hamda chet ellik mutaxassislar ishtirokida ekspertizadan o‘tkazish tizimini joriy etish chora-tadbirlari belgilangan.
Shuningdek, o‘rta ta’lim tizimini zamon talablariga moslashtirish maqsadida:
- umumiy o‘rta ta’lim muassasalarida darsliklarni yangilash dasturini amalga oshirish uchun davlat budjetidan 605 milliard so‘m ajratiladi;
- 141 mingta yangi o‘quv o‘rinlari yaratilib, ularning soni 2026-yil yakuniga qadar 1,2 milliongacha yetkaziladi;
- maktab o‘quvchilarini kasb-hunarga o‘qitish bo‘yicha davlat buyurtmasi asosida umumta’lim maktablari kasb o‘rganish istagidagi bitiruvchilarini davlat tomonidan kamida bir kasbni egallashiga ko‘maklashuvchi tizim joriy etiladi.
Izoh (0)