Нурсултон Назарбоевнинг матбуот котиби: «Элбоши Қозоғистон пойтахтида бўлиб турибди»
Қозоғистоннинг биринчи президенти Нурсултон Назарбоевнинг матбуот котиби Айдос Укибай элбошининг Қозоғистон пойтахтида эканлигини маълум қилди. Бу ҳақда «Tengrinews.кз» хабар қилган.
Фото: Telegram
«Элбоши Қозоғистон пойтахти – Нур-Султон шаҳрида. Ёлғон ва одамларни адаштирадиган бўҳтон маълумотларни тарқатмасликни сўраймиз. Элбоши бир қатор маслаҳатлашув учрашувларини ўтказди ва Қозоғистон президенти Қосим-Жўмарт Тўқаев билан тўғридан-тўғри мулоқотда бўлиб турибди.
Шунингдек, Нурсултон Назарбоев Қозоғистон билан дўстона муносабатларга эга бир қатор хориж давлатларининг раҳбарлари билан ҳам телефон орқали суҳбатлашди.
Элбоши барчани ҳозирги синовлардан ўтиш, мамлакат яхлитлигини сақлаб қолиш учун Қозоғистон президенти атрофида бирлашишга чақиради», – деб ёзган Укибай Twitter’да.
Қозоғистондаги вазият 2 январь куни Жанаўзен шаҳрида (Манғистау вилоятидаги шаҳар) суюлтирилган газ нархининг икки баравар ошишига қарши митинглар бошланганидан сўнг кескинлашди. Чиқишлар иқтисодий ва сиёсий талаблар билан бутун мамлакат бўйлаб оммавий норозилик намойишларига айланиб кетди. 4 ва 5 январь кунлари Олмаотада намойишчиларнинг хавфсизлик ходимлари билан тўқнашуви кузатилди. Мамлакат бўйлаб интернет узиб қўйилган. Мобил алоқа ҳам деярли ишламаяпти. Қозоғистон президенти Қосим-Жўмарт Тўқаев мамлакатдаги оммавий тартибсизликлар пайтида ҳалок бўлганлар ва жароҳатланганлар борлигини айтди. 6 январда Коллектив Хавфсизлик Шартномаси Ташкилоти (КХШТ) тинчликпарвар кучлари Қозоғистонга жўнатди. 7 январда Тўқаев Қозоғистонда конституциявий тартиб тикланганини эълон қилди ва мамлакат бўйлаб террорчилик хавфининг юқори даражаси жорий этилди.
Изоҳ (0)