Ижтимоий тармоқларда «Бухорода таҳсил олаётган 23 ёшли қашқадарёлик талаба ижарадаги уйи ҳаммомидан ўлик ҳолда топилди. Марҳум ирригация институтида ўқиётган эди. Йигитнинг яқинлари унинг ўлими уюштирилганини айтмоқда» сарлавҳали хабар тарқалди. «Дарё» мухбири воқеа тафсилотларини ўрганди.
Маълум бўлишича, Қашқадарё вилоятининг Шаҳрисабз туманидаги «Қутчи» қишлоғида туғилган 23 ёшли талаба 2021 йилнинг 23 ноябрь куни ижарада яшаб келган хонадонининг ҳаммомидан ўлик ҳолда топилган.
«Лочинбек Эргашев тартибли, одоб-ахлоқли ҳамда интилувчан талабалардан бири бўлган. Учинчи курс бошлангунига қадар талабалар ётоқхонасида, 2021 йилнинг сентябрь ойидан эса институт яқинидаги маҳаллаларнинг биридан ижарага уй олиб кўчиб чиққан. У талабаларга берилаётган имтиёзлардан фойдаланган ҳолда ўқишини Қашқадарёдаги олийгоҳлардан бирига кўчириш ҳаракатида юрганди», — дейди марҳум талаба ҳақида гапирган филиал директори Шавкат Имомов.
Лочинбек таҳсил олган факультет деканининг ёшлар билан ишлаш бўйича ўринбосари Камолиддин Обидовнинг айтишича, марҳум Бухоро шаҳридаги Орифон кўчасидаги хонадонда курсдошлари — Ризо Субҳанов, Алишер Тошпўлатов ҳамда Шаҳзод Обидовлар билан бирга яшаган. Факультет масъул ходими Хуршид Ниёзов Лочинбекнинг вафотидан икки кун илгари улар яшаётган ижара уйга бориб, талабалар ҳолидан хабар олган. Уларга электр токи ва газдан қандай тартибда фойдаланиш кераклигини тушунтирган.
Марҳумни таниганларнинг айтишича, Лочинбек ўқишдан ташқари вақтларида пул ишлаш мақсадида дўстлари билан мардикор бозорга чиқиб, тирикчилик қилиб келган. Жумладан, институт докторанти Ғиёс Ҳамроевдан меҳнатига яраша ҳақ тўлайдиган иш берувчи топиб беришда ҳам кўмак сўраган.
«Ўзим ҳам талабалик йилларимни анча-мунча қийинчиликлар билан ўтказганим учунми, болаларга кўмаклашгим келди. Ўтган йилнинг 23 ноябрь куни болаларни танишимнинг уйига олиб бордим. Ишлашди. Ҳар бири 70 минг сўмдан пул олиб, ижара уйларига қайтишди. Худди шу куни кечқурун Лочинбекнинг вафоти ҳақидаги хабарни эшитиб, тошдай қотганимни яширмайман», — дейди Ғиёс Ҳамроев.
Марҳум Лочинбек билан ижарада яшаган талабаларнинг сўзларига кўра, улар шу куни, тахминан, соат 18:30 да ижара уйига қайтган. Лочинбек чўмилиш учун ҳаммомга кириб-чиқишини билдирган. Соат 18:46 да унинг онаси Хурсандой Холмуродова ўғлидан ҳол-аҳвол сўраш мақсадида унга қўнғироқ қилган. У эса чўмилиб чиққач, қўнғироқ қилишини айтган ҳамда қўл телефони билан ҳаммомга кириб кетган.
Айтилишича, орадан 1—1,5 соат вақт ўтгач, онаси яна қўнғироқ қилган. Бироқ ўғли телефонига жавоб бермагач, унинг шерикларига қўнғироқ қилиб сўраган. Улар Лочинбекнинг ҳалиям ҳаммомда эканини билдирган. Орадан яна анча вақт ўтган. Лочинбекдан дарак бўлавермагач, шериклари хавотир ола бошлаган. Унинг қўл телефонига қайта-қайта қўнғироқ қилган. Шундан сўнг уй эгаси 70 ёшли Муҳаррам Ҳакимовага билдиришган ва ҳаммом эшигини бузиб кирган. Бу пайтда эса Лочинбек ҳаммомнинг мармар тошига узала тушган ҳолда ўлиб ётган.
Мазкур ҳолат юзасидан Бухоро шаҳар прокуратураси томонидан терговга қадар текширув жараёнида судга оид тиббиёт экспертизаси тайинланган. Унга кўра, марҳумнинг тизза, елка ва чап кўз охирида кичик ўлчамли шилинмалар аниқланган.
«Бироқ ушбу енгил тан жароҳатлари одам ҳаёти учун хавфли эмас ва бу ўлимга сабаб бўлмаган дея хулоса қилинган. Шунингдек, судга оид тиббиёт экспертизаси хулосасида эса марҳумнинг қонида 55 фоиз карбоксигемоглобин моддаси топилгани қайд этилган. Морфологик белгиларга асосан, ис газидан заҳарланиш ҳамда ўлим ҳақидаги гувоҳномага кўра, унинг ўткир юрак-қон томир ва нафас фаолияти етишмовчилиги оқибатида вафот этгани кўрсатилган», — дейди вилоят прокуратураси матбуот хизмати раҳбари Анвар Эсанов.
Бухоро шаҳар прокуратурасининг 2021 йил 27 ноябрдаги топшириғига кўра, марҳум Лочинбек Эргашев яшаган хонадон ҳаммомида хизмат текшируви ўтказилган. Хизмат текширувига прокуратура вакиллари ҳамда «Бухорошаҳаргаз» таъминоти бўлими масъуллари жалб қилинган.
«Хизмат текшируви давомида мазкур хонадоннинг ҳаммом қисмидаги табиий газ орқали иситишга мўлжалланган мосламаларнинг тўғри ўрнатилгани, табиий газ орқали иситишга мўлжалланган мосламаларнинг белгиланган тартибда назоратдан ўтказилгани, куз-қиш мавсумига тайёргарлик кўриш ва ис газидан фуқаролар заҳарланишининг олдини олиш бўйича ишлар амалга оширилгани аниқланди. Шунингдек, хонадонда газ жиҳозлари ҳам техник талабларга мос равишда ўрнатилгани маълум бўлган», — дейди вилоят Фавқулодда вазиятлар бошқармаси ахборот хизмати раҳбари Миржон Файзуллаев.
«Бухорошаҳаргаз» таъминоти бўлими бошлиғи Абдураҳмон Тешабоевнинг «Дарё»га билдиришича, ҳаммомда бир дона АГВ русумли сув иситиш қозони табиий газ тармоғига уланган бўлиб, кесими 15 ммли газ қувури жўмраги ёпиқ ҳолатда бўлган. Газ тармоғи, газ жўмраклари ва уланиш жойлари совун кўпиги билан текшириб кўрилган ва ҳеч қандай газ сизиб чиқиш ҳолатлари аниқланмаган.
«Иситиш қозони тутун мўрисида ҳам ҳаво тортишиш кучи мавжудлиги, шунингдек, икки-уч кун орасида хонадон газ таъминотида узилишлар бўлмагани аниқланди», — дейди Абдураҳмон Тешабоев.
«Дарё» мухбири билан телефон орқали мулоқот қилган марҳумнинг отаси Ҳасан Турсунов прокуратура хулосасидан норозилиги ҳамда ўғли ис гази таъсиридан вафот этганига ишонмаётганини билдирди.
«Узоқ йиллардан бери пул ишлаш ҳамда болаларимни оёққа турғазиш мақсадида Россияга қатнайман. Мудҳиш хабарни эшитиб, Ўзбекистонга қайтдим. Ахир мен ўғлимни ишлаш учун эмас, ўқиш учун Бухорога жўнатганман. Ҳеч кимнинг бошига бундай дардни солмасин. Болам спортчи, соғлом бола эди. Саломатлигидан ҳеч қандай шикояти йўқ эди. Мен унинг ўз ажали билан ўлмаганини исботлашда кўмак сўрайман. Ҳатто ўғлимнинг қўл телефонидаги соат 18:30 дан кейинги қўнғироқларнинг ўчириб юборилганини қандай тушуниш мумкин», — дейди Ҳасан Турсунов.
Олийгоҳдаги деканнинг ёшлар билан ишлаш бўйича ўринбосари Камолиддин Обидов эса ушбу ҳолатни қуйидагича изоҳлади: «Хабарни эшитибоқ, зудлик билан воқеа жойига етиб келдик. Боланинг ота-онасига қайта-қайта қўнғироқ қилдик. Бегона рақам, деб кўтаришмади, шекилли, ўчириб қўяверишди. Шундан сўнг марҳумнинг қўл телефонидан қўнғироқ қилишга уриндик, бироқ уям кодлаб қўйилган экан. Ноилож унинг телефонининг сим картасини олиб, бошқа телефонга қўйиб, шундан кейингина оиласига хабарни етказа олдик», — дейди Камолиддин Обидов.
Хонадон эгаси Муҳаррама Ҳакимова марҳум ва у билан бирга ижарада яшаган талабалар ҳеч қачон жанжаллашмаганини, оғзаки бўлса-да тортишишмаганини айтмоқда.
«70 ёшдаман. Етарли шароитга эга бўлмаса ҳам жўралар уйимда аҳил-иноқ яшашди. Ҳаммасининг қўли гул, ҳар ишда уста эди. Бўш ўтиришмасди. Лочинбек контрактда ўқирди-да. Вақт топди, дегунча, ота-онасига кўмак бўлсин учун бирор жойга бориб, ишлаб, озми-кўпми ўзига пул топиб келарди. Ҳалол, меҳнатсевар, ақлли, идрокли йигит эди», — дейди Муҳаррама Ҳакимова.
Бухоро шаҳар прокуратураси текширув давомида бирор-бир шахснинг хатти-ҳаракатларида марҳумга нисбатан жиноят таркиби аниқланмаганлиги сабабли ишни Жиноят-процессуал кодекснинг 83-моддаси (реабилитация учун асослар) 2-бандига кўра жиноят иши қўзғатишни рад қилиш билан тугатган.
Изоҳ (0)