Ijtimoiy tarmoqlarda “Buxoroda tahsil olayotgan 23 yoshli qashqadaryolik talaba ijaradagi uyi hammomidan o‘lik holda topildi. Marhum irrigatsiya institutida o‘qiyotgan edi. Yigitning yaqinlari uning o‘limi uyushtirilganini aytmoqda” sarlavhali xabar tarqaldi. “Daryo” muxbiri voqea tafsilotlarini o‘rgandi.
Ma’lum bo‘lishicha, Qashqadaryo viloyatining Shahrisabz tumanidagi “Qutchi” qishlog‘ida tug‘ilgan 23 yoshli talaba 2021-yilning 23-noyabr kuni ijarada yashab kelgan xonadonining hammomidan o‘lik holda topilgan.
“Lochinbek Ergashev tartibli, odob-axloqli hamda intiluvchan talabalardan biri bo‘lgan. Uchinchi kurs boshlanguniga qadar talabalar yotoqxonasida, 2021-yilning sentabr oyidan esa institut yaqinidagi mahallalarning biridan ijaraga uy olib ko‘chib chiqqan. U talabalarga berilayotgan imtiyozlardan foydalangan holda o‘qishini Qashqadaryodagi oliygohlardan biriga ko‘chirish harakatida yurgandi”, — deydi marhum talaba haqida gapirgan filial direktori Shavkat Imomov.
Lochinbek tahsil olgan fakultet dekanining yoshlar bilan ishlash bo‘yicha o‘rinbosari Kamoliddin Obidovning aytishicha, marhum Buxoro shahridagi Orifon ko‘chasidagi xonadonda kursdoshlari — Rizo Subhanov, Alisher Toshpo‘latov hamda Shahzod Obidovlar bilan birga yashagan. Fakultet mas’ul xodimi Xurshid Niyozov Lochinbekning vafotidan ikki kun ilgari ular yashayotgan ijara uyga borib, talabalar holidan xabar olgan. Ularga elektr toki va gazdan qanday tartibda foydalanish kerakligini tushuntirgan.
Marhumni taniganlarning aytishicha, Lochinbek o‘qishdan tashqari vaqtlarida pul ishlash maqsadida do‘stlari bilan mardikor bozorga chiqib, tirikchilik qilib kelgan. Jumladan, institut doktoranti G‘iyos Hamroyevdan mehnatiga yarasha haq to‘laydigan ish beruvchi topib berishda ham ko‘mak so‘ragan.
“O‘zim ham talabalik yillarimni ancha-muncha qiyinchiliklar bilan o‘tkazganim uchunmi, bolalarga ko‘maklashgim keldi. O‘tgan yilning 23-noyabr kuni bolalarni tanishimning uyiga olib bordim. Ishlashdi. Har biri 70 ming so‘mdan pul olib, ijara uylariga qaytishdi. Xuddi shu kuni kechqurun Lochinbekning vafoti haqidagi xabarni eshitib, toshday qotganimni yashirmayman”, — deydi G‘iyos Hamroyev.
Marhum Lochinbek bilan ijarada yashagan talabalarning so‘zlariga ko‘ra, ular shu kuni, taxminan, soat 18:30 da ijara uyiga qaytgan. Lochinbek cho‘milish uchun hammomga kirib-chiqishini bildirgan. Soat 18:46 da uning onasi Xursandoy Xolmurodova o‘g‘lidan hol-ahvol so‘rash maqsadida unga qo‘ng‘iroq qilgan. U esa cho‘milib chiqqach, qo‘ng‘iroq qilishini aytgan hamda qo‘l telefoni bilan hammomga kirib ketgan.
Aytilishicha, oradan 1—1,5 soat vaqt o‘tgach, onasi yana qo‘ng‘iroq qilgan. Biroq o‘g‘li telefoniga javob bermagach, uning sheriklariga qo‘ng‘iroq qilib so‘ragan. Ular Lochinbekning haliyam hammomda ekanini bildirgan. Oradan yana ancha vaqt o‘tgan. Lochinbekdan darak bo‘lavermagach, sheriklari xavotir ola boshlagan. Uning qo‘l telefoniga qayta-qayta qo‘ng‘iroq qilgan. Shundan so‘ng uy egasi 70 yoshli Muharram Hakimovaga bildirishgan va hammom eshigini buzib kirgan. Bu paytda esa Lochinbek hammomning marmar toshiga uzala tushgan holda o‘lib yotgan.
Mazkur holat yuzasidan Buxoro shahar prokuraturasi tomonidan tergovga qadar tekshiruv jarayonida sudga oid tibbiyot ekspertizasi tayinlangan. Unga ko‘ra, marhumning tizza, yelka va chap ko‘z oxirida kichik o‘lchamli shilinmalar aniqlangan.
“Biroq ushbu yengil tan jarohatlari odam hayoti uchun xavfli emas va bu o‘limga sabab bo‘lmagan deya xulosa qilingan. Shuningdek, sudga oid tibbiyot ekspertizasi xulosasida esa marhumning qonida 55 foiz karboksigemoglobin moddasi topilgani qayd etilgan. Morfologik belgilarga asosan, is gazidan zaharlanish hamda o‘lim haqidagi guvohnomaga ko‘ra, uning o‘tkir yurak-qon tomir va nafas faoliyati yetishmovchiligi oqibatida vafot etgani ko‘rsatilgan”, — deydi viloyat prokuraturasi matbuot xizmati rahbari Anvar Esanov.
Buxoro shahar prokuraturasining 2021-yil 27-noyabrdagi topshirig‘iga ko‘ra, marhum Lochinbek Ergashev yashagan xonadon hammomida xizmat tekshiruvi o‘tkazilgan. Xizmat tekshiruviga prokuratura vakillari hamda “Buxoroshahargaz” ta’minoti bo‘limi mas’ullari jalb qilingan.
“Xizmat tekshiruvi davomida mazkur xonadonning hammom qismidagi tabiiy gaz orqali isitishga mo‘ljallangan moslamalarning to‘g‘ri o‘rnatilgani, tabiiy gaz orqali isitishga mo‘ljallangan moslamalarning belgilangan tartibda nazoratdan o‘tkazilgani, kuz-qish mavsumiga tayyorgarlik ko‘rish va is gazidan fuqarolar zaharlanishining oldini olish bo‘yicha ishlar amalga oshirilgani aniqlandi. Shuningdek, xonadonda gaz jihozlari ham texnik talablarga mos ravishda o‘rnatilgani ma’lum bo‘lgan”, — deydi viloyat Favqulodda vaziyatlar boshqarmasi axborot xizmati rahbari Mirjon Fayzullayev.
“Buxoroshahargaz” ta’minoti bo‘limi boshlig‘i Abdurahmon Teshaboyevning “Daryo”ga bildirishicha, hammomda bir dona AGV rusumli suv isitish qozoni tabiiy gaz tarmog‘iga ulangan bo‘lib, kesimi 15 mmli gaz quvuri jo‘mragi yopiq holatda bo‘lgan. Gaz tarmog‘i, gaz jo‘mraklari va ulanish joylari sovun ko‘pigi bilan tekshirib ko‘rilgan va hech qanday gaz sizib chiqish holatlari aniqlanmagan.
“Isitish qozoni tutun mo‘risida ham havo tortishish kuchi mavjudligi, shuningdek, ikki-uch kun orasida xonadon gaz ta’minotida uzilishlar bo‘lmagani aniqlandi”, — deydi Abdurahmon Teshaboyev.
“Daryo” muxbiri bilan telefon orqali muloqot qilgan marhumning otasi Hasan Tursunov prokuratura xulosasidan noroziligi hamda o‘g‘li is gazi ta’siridan vafot etganiga ishonmayotganini bildirdi.
“Uzoq yillardan beri pul ishlash hamda bolalarimni oyoqqa turg‘azish maqsadida Rossiyaga qatnayman. Mudhish xabarni eshitib, O‘zbekistonga qaytdim. Axir men o‘g‘limni ishlash uchun emas, o‘qish uchun Buxoroga jo‘natganman. Hech kimning boshiga bunday dardni solmasin. Bolam sportchi, sog‘lom bola edi. Salomatligidan hech qanday shikoyati yo‘q edi. Men uning o‘z ajali bilan o‘lmaganini isbotlashda ko‘mak so‘rayman. Hatto o‘g‘limning qo‘l telefonidagi soat 18:30 dan keyingi qo‘ng‘iroqlarning o‘chirib yuborilganini qanday tushunish mumkin”, — deydi Hasan Tursunov.
Oliygohdagi dekanning yoshlar bilan ishlash bo‘yicha o‘rinbosari Kamoliddin Obidov esa ushbu holatni quyidagicha izohladi: “Xabarni eshitiboq, zudlik bilan voqea joyiga yetib keldik. Bolaning ota-onasiga qayta-qayta qo‘ng‘iroq qildik. Begona raqam, deb ko‘tarishmadi, shekilli, o‘chirib qo‘yaverishdi. Shundan so‘ng marhumning qo‘l telefonidan qo‘ng‘iroq qilishga urindik, biroq uyam kodlab qo‘yilgan ekan. Noiloj uning telefonining sim kartasini olib, boshqa telefonga qo‘yib, shundan keyingina oilasiga xabarni yetkaza oldik”, — deydi Kamoliddin Obidov.
Xonadon egasi Muharrama Hakimova marhum va u bilan birga ijarada yashagan talabalar hech qachon janjallashmaganini, og‘zaki bo‘lsa-da tortishishmaganini aytmoqda.
“70 yoshdaman. Yetarli sharoitga ega bo‘lmasa ham jo‘ralar uyimda ahil-inoq yashashdi. Hammasining qo‘li gul, har ishda usta edi. Bo‘sh o‘tirishmasdi. Lochinbek kontraktda o‘qirdi-da. Vaqt topdi, deguncha, ota-onasiga ko‘mak bo‘lsin uchun biror joyga borib, ishlab, ozmi-ko‘pmi o‘ziga pul topib kelardi. Halol, mehnatsevar, aqlli, idrokli yigit edi”, — deydi Muharrama Hakimova.
Buxoro shahar prokuraturasi tekshiruv davomida biror-bir shaxsning xatti-harakatlarida marhumga nisbatan jinoyat tarkibi aniqlanmaganligi sababli ishni Jinoyat-protsessual kodeksning 83-moddasi (reabilitatsiya uchun asoslar) 2-bandiga ko‘ra jinoyat ishi qo‘zg‘atishni rad qilish bilan tugatgan.
Izoh (0)