Расман: «Барселона» ярим ҳимоячиси Филиппе Коутиньо АПЛга қайтди

«Барселона» футболчиси Филиппе Коутиньо фаолиятини «Астон Вилла»да давом эттиради. Бу ҳақда инглиз клуби матбуот хизмати маълум қилди.

«Астон Вилла» 29 ёшли футболчини сотиб олиш ҳуқуқи билан 2021/22 йилги мавсум сўнгига қадар ижарага олди. Бразилиялик футболчи маошининг асосий қисми «Астон Вилла» томонидан қоплаб берилади. Коутиньо бирмингемликлар бош мураббийи Стивен Жеррард билан «Ливерпуль»да бирга ўйнаган.

«Барселона» Коутиньони 2018 йилнинг январида 135 миллион евро эвазига «Ливерпуль»дан сотиб олганди. Филиппе фаолияти давомида «Интер», «Васко да Гама», «Эспаньол» ва «Бавария» каби жамоаларда ҳам тўп сурган.

Футболчи жорий мавсум Испания чемпионатида 12 та ўйинда иштирок этиб, ўз ҳисобига иккита гол ёздириб қўйди.