Жиззах вилояти Ғаллаорол туманида 2021 йилнинг 28 декабрь куни зовурда ёниб кетган Spark, унинг ичидан эса мурда топилди. Бу ҳақда вилоят Ички ишлар бошқармаси хабар қилди.
Маълум қилинишича, шу куни соат 09:30 атрофида фуқаро туманнинг «Найман» қишлоғидаги дала майдони ёнида жойлашган зовур ичида ёниб кетган Spark машинасини кўриб қолган. Унинг хабарига биноан вилоят Прокуратураси ва ИИБ ходимлари етиб келган.
Автоулов текширилганда унинг ичида куйиб кетган жасад бор экани, машинада давлат рақами мавжуд эмаслиги аниқланган. Воқеа жойида қолдирилган излар ва ҳудудга туташ ерлардаги кузатув камералари ўрганилган.
Натижада машина эгасининг шахси аниқланиб, у Самарқанд шаҳри «Зарафшон» маҳалласида яшовчи, муқаддам ўғрилик жиноятини содир этгани учун судланган, гиёҳванд фуқаро экани маълум бўлган. Унинг яқинлари йигит бир куни илгари чиқиб кетиб, уйига қайтмаганини билдирган. Марҳум билан яқин орада алоқада бўлган шахсларни суриштириш давомида жиноят фош бўлган.
Аниқланишича, фуқарони Самарқанд вилояти Жомбой тумани «Бешсаид» маҳалласида яшовчи 3 нафар фуқаро наркотик моддалар билан таъминлаб турган. Унинг қарзи 3 минг долларга етгач, улар қарз узилмагунча гиёҳванд модда бермасликка қарор қилган. Шунда йигит ИИБга бориб, уларнинг айбини очишини айтиб, пўписа қилган. Улар қўрқиб кетиб, йигитдан қутилиш режасини тузган.
27 декабрь куни фуқаро оғуфурушлар олдига 3 миллион сўм пул билан борган. Таъминотчиларнинг рад жавобидан сўнг яна уларни сотишини билдирган. Шунда наркотик сотувчиларидан бири йигитни болға билан, бошқа бири теша билан урган. Йигит қочмоқчи бўлганда сувли зовурга йиқилиб, шу ерда ҳалок бўлган.
Воқеа содир бўлганда марихуана таъсирида бўлган шахслар жасаддан қутулиш мақсадида уни Spark’нинг орқа ўриндиғига олиб, йўлга чиққан. Ўзлари билан идишда 10 литр бензин ҳам олган. «Найман» қишлоғидаги дала майдонида жойлашган зовурга етиб келгач, йигитни рол ўриндиғига ўтказиб, автоуловни зовурга йиқитишган ва ёқиб юборишган.
Ҳозирда терговга қадар текширув ҳаракатлари олиб борилмоқда.
Изоҳ (0)