7 январь куни эрта тонгда кучли туман сабаб самолётлар Наманган аэропортига учиш-қўнишни амалга ошира олмади, деб хабар беради Uzbekistan Airports. Шунингдек, туман Андижон ва Навоий аэрпортларини ҳам қоплаган.
Наманган аэропортидаги кучли туман туфайли — кўриш масофаси 150 метр атрофида — «Аэрофлот» авиакомпаниясининг Санкт-Петербургдан парвоз қилган AFL602 рейси соат 07:05 да белгиланган аэропортга қўна олмай, Тошкентдаги захира аэродромга йўналтирилган. Айни вақтда авиакомпания йўловчиларни меҳмонхона ва егуликлар билан таъминлаган. Самолёт маҳаллий вақт билан соат 18:40 да Тошкентдан Наманганга учади.
Шунингдек, ноқулай об-ҳаво шароити туфайли Uzbekistan Airways авиакомпаниясининг Тошкент—Наманган—Новосибирск йўналиши бўйича соат 10:35 да учиши керак бўлган HY3669/69 рейси ушланиб қолган.
Кучли туман Андижон (кўриш масофаси 400 метр) ва Навоий (кўриш масофаси 50 метр) аэропортларида ҳам кузатилган. Бу вақтда ушбу аэропортларда жадвалга мувофиқ рейслар бўлмаган. Ҳозирга келиб, туман тарқалган, аэропортлар рейсларни қабул қилишга тайёр.
Эслатиб ўтамиз, 24 декабрь куни Тошкентдан учадиган самолёт туман туфайли Андижонга қўна олмаган, 29 декабрь куни эса Наманган ва Андижон аэропортларида кўриш имконияти ёмонлиги сабабли самолётлар учиш ва қўнишни амалга ошира олмаганди. 3 январь куни Урганч ва Нукус аэропортларида кўриш имконияти ёмонлиги сабабли самолётлар учиш ва қўнишни амалга ошира олмаган эди. 6 январь куни Тошкентдан учган иккита самолёт туман сабаб белгиланган аэропортларга қўна олмаган.
Изоҳ (0)