Jizzaxda og‘ufurushlar ularni IIBga chaqib berishini aytgan mijozni mashinasi bilan yoqib yubordi

Jizzax viloyati G‘allaorol tumanida 2021-yilning 28-dekabr kuni zovurda yonib ketgan Spark, uning ichidan esa murda topildi. Bu haqda viloyat Ichki ishlar boshqarmasi xabar qildi.

Ma’lum qilinishicha, shu kuni soat 09:30 atrofida fuqaro tumanning “Nayman” qishlog‘idagi dala maydoni yonida joylashgan zovur ichida yonib ketgan Spark mashinasini ko‘rib qolgan. Uning xabariga binoan viloyat Prokuraturasi va IIB xodimlari yetib kelgan.

Avtoulov tekshirilganda uning ichida kuyib ketgan jasad bor ekani, mashinada davlat raqami mavjud emasligi aniqlangan. Voqea joyida qoldirilgan izlar va hududga tutash yerlardagi kuzatuv kameralari o‘rganilgan.

Natijada mashina egasining shaxsi aniqlanib, u Samarqand shahri “Zarafshon” mahallasida yashovchi, muqaddam o‘g‘rilik jinoyatini sodir etgani uchun sudlangan, giyohvand fuqaro ekani ma’lum bo‘lgan. Uning yaqinlari yigit bir kuni ilgari chiqib ketib, uyiga qaytmaganini bildirgan. Marhum bilan yaqin orada aloqada bo‘lgan shaxslarni surishtirish davomida jinoyat fosh bo‘lgan.

Aniqlanishicha, fuqaroni Samarqand viloyati Jomboy tumani “Beshsaid” mahallasida yashovchi 3 nafar fuqaro narkotik moddalar bilan ta’minlab turgan. Uning qarzi 3 ming dollarga yetgach, ular qarz uzilmaguncha giyohvand modda bermaslikka qaror qilgan. Shunda yigit IIBga borib, ularning aybini ochishini aytib, po‘pisa qilgan. Ular qo‘rqib ketib, yigitdan qutilish rejasini tuzgan.

27-dekabr kuni fuqaro og‘ufurushlar oldiga 3 million so‘m pul bilan borgan. Ta’minotchilarning rad javobidan so‘ng yana ularni sotishini bildirgan. Shunda narkotik sotuvchilaridan biri yigitni bolg‘a bilan, boshqa biri tesha bilan urgan. Yigit qochmoqchi bo‘lganda suvli zovurga yiqilib, shu yerda halok bo‘lgan.

Voqea sodir bo‘lganda marixuana ta’sirida bo‘lgan shaxslar jasaddan qutulish maqsadida uni Spark’ning orqa o‘rindig‘iga olib, yo‘lga chiqqan. O‘zlari bilan idishda 10 litr benzin ham olgan. “Nayman” qishlog‘idagi dala maydonida joylashgan zovurga yetib kelgach, yigitni rol o‘rindig‘iga o‘tkazib, avtoulovni zovurga yiqitishgan va yoqib yuborishgan.

Hozirda tergovga qadar tekshiruv harakatlari olib borilmoqda.