Ўзбекистон Россияга табиий газ экспортини қайта тиклашни режалаштирмаяпти. Бу ҳақда Энергетика вазирлиги матбуот хизматига таяниб, «Gazeta.uz» хабар берди. Коронавирус пандемияси таъсири доирасида Россияга газ экспортини тўлиқ тўхтатиш ҳамда Хитойга етказиб беришни уч баробар қисқартириш 2020 йилнинг июлидаёқ маълум қилинганди.
«Ҳозирги вақтда Россияга газ экспорти амалга оширилмаяпти ва 2022 йил учун режаларда ҳам йўқ», — дея таъкидлаган вазирлик.
2018 йилда Ўзбекистон «Газпром»га 3,8 миллиард кубометр газ етказиб берган, 2019 йилда эса таъминотни 4,9 миллиард кубометргача кўпайтирган. 2020 йилга келиб эса газ етказиб беришни тўхтатган.
Бундан ташқари, «Газпром» 2020 йилдан бошлаб Ўзбекистонга туркман газини етказиб беришни бошлаган: 2020 йилда 0,9 миллиард кубометр етказилган, ушбу кўрсаткич 2021 йилнинг биринчи чорагида эса — 1,5 миллиард кубни ташкил қилган.
Эслатиб ўтамиз, 2020 йилнинг январида бош вазир Абдулла Арипов табиий газни экспорт қилишни тўхтатилишини маълум қилганди. Ҳукумат раҳбари 2025 йилга бориб табиий газни қайта ишлаб, қўшимча қийматли маҳсулотлар ишлаб чиқаришни кенгайтириш чоралари кўрилишини билдирганди. Октябрь ойида президент «Геология-қидирув ишларини янада рағбатлантириш ва ер қаъридан фойдаланувчиларга солиқ солиш тартибини такомиллаштириш чора-тадбирлари тўғрисида»ги қарони имзолади. Унда кўра, Ўзбекистонда табиий газ импорти божхона божидан озод қилинади.
Ҳозир Ўзбекистондан газ экспортининг деярли барчаси Хитой ҳиссасига тўғри келади. Ўзбекистон январь октябрь ойларида Хитойга умумий қиймати 601,3 миллион долларга тенг 2,6 миллион тонна газ экспорт қилган. Давлат статистика қўмитаси маълумотларига кўра, январь—октябрь ойларида Ўзбекистон умумий қиймати 596,8 млн долларга тенг газ экспорт қилган, бу эса Хитой божхона бошқармаси томонидан эълон қилинган кўрсаткич билан деярли бир хил.
Изоҳ (0)