Келажакда талабалар чегирма билан онлайн тарзда чипта олишлари мумкин бўлади. Бу ҳақда «Ўзбекистон темир йўллари» АЖ бўлим бошлиғи Фозил Шарипов 7 январь куни бўлиб ўтган Халқаро пресс-клубда маълум қилди, дея хабар берди «Дарё» мухбири.
«Ўзбекистон темир йўллари» вакилининг сўзларига кўра, талабалар поездга чиптани онлайн тарзда харид қилганда чегирма берилмайди.
«Онлайн олинган чипталар худди шундай тарзда қайтарилиши мумкин. Электрон чипта сотиш 2017 йилнинг декабрь ойидан бошлаб ишга туширилган. Сўнгги бир йил ичида бу жараён 15 марта модернизация қилинди. Бунда турли қўшимчалар киритиляпти, йўловчиларга электрон тарзда чипта сотиб олишда қулайлик яратиляпти», — дейди Фозил Шарипов.
Унинг сўзларига кўра, келажакда талабалар чегирма билан онлайн тарзда чипта олишлари мумкин бўлади.
Эслатиб ўтамиз, Ўзбекистонда талаба ва ўқувчилар учун қишки таътил 25 декабрдан бошланган эди. Таътил 2022 йилнинг 10 январигача давом этиши ва дарс жараёнлари 11 январдан бошланиши белгиланганди. Кейинроқ олий таълим муассасаларининг талабалари, академик лицей ва ҳунар мактаблари ўқувчилари учун қишки таътил муддати 24 январгача узайтирилди. Бунга сабаб қилиб ректорлар, проректорлар, деканлар ва молия масалаларига масъуллар учун ўз касбий маҳоратини ошириш, янгича тартибда ишлашни бошлаш мақсадида 2022 йил 10—24 январь кунлари амалий семинар-тренинглар ташкил этилиши кўрсатилган.
Қишки таътил муносабати билан Uzbekistan Airways ва «Ўзбекистон темир йўллари» Янги йил муносабати билан махсус чегирмалар эълон қилган. Кейинчалик талабаларга авиа ва темир йўл чипталарни 24 январгача бепул алмаштириш имкони берилди.
Изоҳ (0)