2021 йилда Президент виртуал қабулхонаси ва Халқ қабулхоналарига 1,6 миллиондан ортиқ (ойда ўртача 133 минг, кунига ўртача 4,4 мингдан зиёд) мурожаат келиб тушган. Президент халқ қабулхонасининг «Дарё»га маълум қилишича, уларнинг 53 фоизи ёки 865 мингтаси ижобий ҳал этилган.
2021 йилда аҳолидан қуйидаги масалаларда энг кўп мурожаатлар келиб тушган:
- ижтимоий нафақалар масаласи —190 мингта;
- иш билан таъминлаш — 96 мингта;
- мажбурий ижро фаолияти, алимент ва қарз суммаларини ундириш — 94 мингта;
- банк кредитлари — 77 мингта;
- уй-жой билан таъминлаш — 68 мингта.
Таҳлилларга кўра, 2021 йилда энг кўп мурожаатлар Қашқадарё вилояти ҳиссасига тўғри келди — 197 мингта. Сурхондарё вилоятидан 181 мингта мурожаат келиб тушган. Тошкент шаҳридан эса 165 мингта мурожаат қабул қилинган. Шунингдек, Тошкент (155 минг), Самарқанд (150 минг) ва Фарғона (145 минг) вилоятларидан ҳам кўплаб мурожаатлар йўлланган.
Вазирлик ва идоралар кесимида таҳлил қилганда энг кўп мурожаатлар Молия вазирлигига оид бўлган (173 мингта). Унга кейинги ўринларда Ички ишлар вазирлигига тегишли (122 мингта), Бандлик ва меҳнат муносабатлари вазирлигига тааллуқли (105 мингта) мурожаат келиб тушган.
Бундан ташқари, 2021 йилда Мажбурий ижро бюроси, Бош прокуратура, Олий суд ҳамда Марказий банк ва тижорат банклари тизимига тааллуқли мурожаатлар сони ҳам анча катта бўлган.
2021 йилда вилоят, туман ва шаҳарлар секторлари раҳбарлари томонидан Халқ қабулхоналари билан ҳамкорликда 31 927 та сайёр оммавий қабуллар ўтказилган. Уларда 223 412 нафар фуқаронинг мурожаати бўйича 230 446 та масалалари тингланиб, шундан 130 533 та, яъни 56,6 фоиз масалалар қаноатлантирилган.
Шавкат Мирзиёев раислигида 2021 йилнинг 23 июлида ўтказилган видеоселектор йиғилишида аҳоли мурожаатлари билан ишлаш тизимини янгича ташкил қилиш чора-тадбирлари кўриб чиқилиб, соҳада кўплаб янги механизмларга старт берилганди. Президент ушбу йиғилишда одамларни мурожаат қилишга мажбур этаётган кўплаб муаммоларни маҳалла кесимида бартараф этиш таклифини илгари сурди.
Яъни вилоят, туман ва шаҳар ҳокимларининг айни йўналишдаги масъулияти кучайтирилди, аҳоли тўғридан-тўғри тун-у кун мурожаат қилиши учун ҳокимларнинг виртуал қабулхонаси ва ижтимоий тармоқларда алоҳида саҳифаларини ташкил этиш вазифаси қўйилди. Мурожаатларнинг барчаси ягона электрон базада жамланиб, Халқ қабулхоналари ҳар чоракда давлат органларининг очиқ рейтингини шакллантириши белгиланди.
Ушбу йиғилишдан сўнг шу кунгача ҳал этилмаган аҳоли мурожаатларини қайта ўрганиш ишларига киришилди. Шу тариқа қисқа вақт ичида 651 мингдан зиёд мурожаат қайта кўриб чиқилиб, уларнинг 78 фоизи ёки 506 минг 536 тасини ижобий ҳал этишга эришилди.
Изоҳ (0)