Қашқадарё вилоятининг Қарши туманида яшовчи Дилноза Раҳмонова прокурор қайнотаси Хидир Каримовнинг ўзбошимчалиги давом этаётганини, туман прокурорининг суд талабини бажармаслигига масъуллар ҳам жим қараб турганини айтмоқда. Бу ҳақда «Дарё» мухбири хабар қилди.
Мухбир билан суҳбатлашган Дилнозанинг айтишича, унинг икки нафар фарзанди 2021 йилнинг 25 декабрь куни прокурор қайнотаси томонидан олиб кетилиб, ҳалигача қайтариб берилмаган. Қайнота суд қарорига ҳурматсизлик қилишда давом этмоқда.
«Мен болаларимни тортиб олишгани, суд қарори талаби қўпол равишда бузилаётгани ҳақида айтгандим. Бу ҳолат ижтимоий тармоқларда тарқалгач, масъуллар — вилоят прокурори ва республика бош прокурори ҳам воқеадан хабар топган деб ўйлайман. Аммо қонунни оёқости қилаётган, суд қарорига нисбатан ҳурматсизлик қилган прокурор қайнотамга ҳеч қандай чора кўрилмади. Болаларим эса ҳамон мендан узоқда», — дейди болалари тортиб олинган она.
Дилноза Раҳмонова прокурор қайнотасининг ўзбошимчалигига нафақат масъул ташкилотлар, Бош прокуратура ҳам чора кўрмаётганидан ажабланаётганини билдирмоқда.
«Бош прокуратура ва масъул ташкилотлар туман прокурорининг қонунсизликка йўл қўяётганига чора кўришга ожизми ёки прокуратура тизимида шунчалик таниш-билишчилик илдиз отганми?», — дейди прокурор қайнотасидан жабр кўраётганини таъкидлаган келин.
Болалари тортиб олинган Дилноза Раҳмонова қонунбузилиши оддий фуқаро томонидан содир этилса, унга нисбатан жазо муқаррарлиги таъминланишини, мансабдорлар, жумладан, прокурор қайнотасига келганда эса ҳамма жим қараб турганини тушунолмаётганини айтмоқда.
«Ҳаётда оддий фуқаро қонунбузилишига йўл қўйса, унга нисбатан тезда жазо муқаррарлиги таъминланганини кўп кўрганмиз ва эшитганмиз. Хўш, мансабдорларга келганда, прокурорларга келганда нега бу қонунларимиз оқсаяпти? Нега айнан прокурор қилмишини фош этиш, унга чора кўрилишига келганда ҳамкасб сифатида ҳурмат қилиш, кўзинг, қошинг дея бир-бирини аяш, унинг айбини ёпишга уриниш кузатилмоқда? Айнан Нишон тумани прокурорининг айбини фош қилиш вақти келганда масъуллар шундай йўл тутишмоқда», — дейди прокурор томонидан ҳуқуқи поймол бўлаётганини айтган фуқаро.
Дилноза Раҳмонова эндиликда фақат Президентга, Президент администрациясига мурожаат қилишга мажбур бўлаётганини айтмоқда.
«Мен президентга, Президент администрациясига мурожаат қилиб, Нишон тумани прокурорининг ўзбошимчалигига кўз юмиб, унинг айбини фош қилишдан тийилаётган Бош прокуратуранинг хатти-ҳаракатига баҳо беришларини, Ўзбекистонда қонун барча учун баробар эканини яна бир бор кўрсатиб беришларини сўраган бўлардим», — дейди Дилноза Раҳмонова.
Эслатиб ўтамиз, аввалроқ Қашқадарёда туман прокурори ўз келинидан унинг икки боласини олиб қўйгани, аёлга эса бу ҳолат устидан судга мурожаат қилиш тавсия этилгани ҳақида хабар берилганди. Мазкур воқеага муносабат билдирган Бош прокуратура ахборот хизмати туман прокурорининг ўзбошимчалигига нисбатан хизмат текшируви тайинланганини, натижа ҳақида маълумот беришини билдирганди.
Изоҳ (0)